Shillong, Rymphang 15
Ka Voice of the People Party (VPP) kaba shong ha ka Liang Pyrshah kan sa wanrah ïa ka jingïatai halor ka jingkhlad ki nongbylla tih dewïong be-aiñ hapoh ka ïingdorbar thawaiñ ha kine ki sngi ban sa sdang ka dorbar mang tyngka.
Haba ïakren bad u nongaiktien ka VPP u Dr. Batskhem Myrboh u la ïathuh ba ki MLA ka VPP kin sa wanrah shibun tylli ki mat ban ïakren ha ïingdorbar thawaiñ na bynta ka jingmyntoi ki paidbah.
U la ïathuh ba ka seng kan sa wanrah ïa ka mat jong ka jingrung be-aiñ ki bar jylla bad ki mynder ri shapoh ka jylla, ka shongsuk shongsain hapoh ka jylla, ka pule puthi, ka koit ka khiah, ka jingjakhlia ka mei mariang, ka Urban Waste Management bad ka jingkhlad ki nongbylla tih dewïong.
Shuh shuh ka seng ka la pynkhreh ki jingïakren ha ki kynta kylli jingkylli, kin ïatai ïa ka jingkren u Lat ka jylla, kin wanrah ïa ki cut motion bad motion.
Kumban shu pynkynmaw ka jingkhlad kiba tih dewïong be-aiñ ha Thangsko kaba hap ha East Jaiñtia ka la wanrah ïa ka jingkhlad haduh 31 ngut haduh ba ka sorkar India ka hap ban tuklar lang.
La sngewthuh ba ki MLA ka Liang Pyrshah kiba kynthup ïa ka VPP bad TMC kin sa wanrah ïa ka jingïatai kaba jur halor ka jingdon ka jaka tih dewïong be-aiñ ha East Jaiñtia Hills district.
Kane ka dorbar mang tyngka kan sdang lashai ka sngi ka 16 tarik Rymphang ha kaba yn ai jingkren da u Lat ka jylla.
