Russia, Rymphang:
Katkum ki khubor, la ong ba ka Russia, ka la khang ïa ka rynsn ‘WhatsApp’ kaba pawnam bha, halor ka jingbym kohnguh jongka, ïa ki aiñ ba la buh jong ka ri, ong ka Russia ha ka Sngi Palei, da kaba kyntu ïa ki 100 million ngut ki nongpyndonkam jongka, kiba dei na Russia, ba kin kylla noh sha ka rukom phah khubor kaba don ha la ka jong ka ri.
Ka Russia ka la pyrshang la bun bnai ban pynkylla ïa ki nongpyndonkam jong ka Russia sha ka ‘Max’, kaba long ka jait rynsan ba la wanrah hi da katei ka ri, kaba la pyntikna thik- pa thik ïa ka jingshngaiñ jong ki nongpyndonkam jongka bad ka ban long ruh ka rynsan ban wanrah jingmyntoi lang ïa ki paidbah nongshong shnong jong ka ri baroh kawei.
“Haba ïadei bad ka jingpynsangeh treikam ïa ka WhatsApp, kane ka long ka rai kaba shisha bad la dep pyntreikam ïa ka,” ong u nongaiktien ka Kremlin, u Dmitry Peskov, haba ïakren bad ki nongthoh khubor ha ka Sngi Thohdieng.
U Peskov u la ong ba katei ka rai ka dei namar ka jingbym kwah jong ka WhatsApp ban kohnguh ïa ki kyndon bad ka shithi jong ka ain jong ka Russia.
“Ka Max ka dei ka lad kaba lah ban ioh, ka nonglam khubor kaba dang kiew, ka lad kaba lah ban ioh ïa ka ri. Bad ka dei ka lad kaba lah ban ioh ha iew na ka bynta ki nongshong shnong,” u la ong.
Ka WhatsApp, kaba long trai da ka Meta, ka kompeni social media jong ka US, ka la ong ha ka Sngi Thohdieng ba ka ngeit ba ka Russia ka pyrshang ban khang pura ïa katei ka jingshakri ha ka jingthmu ban pynbor ïa ki nongpyndonkam sha ka Max.
“Ngi dang bteng ban leh ïa kaba donkam baroh ban pynlong ïa ki nongpyndonkam ban iadei,” ka la ong.
Ki nongkynthoh bad ki nongïakhih ïa ka hok ki ong ba ki jingkhang ki dei ka jingpyrshang kaba shai jong ka Kremlin ban pynjur ïa ka jingsynshar bad jingpeitngor ïa ka jingpyndonkam internet ha Russia.
Ka tnat peitngor ïa ka internet jong ka Russia, ka la ong ha ka sngi Balang, ba kan buh ïa ki “jingpynjari kyndon” ha ka jaka phah khubor Telegram, kaba ka la kynnoh ruh ba kam bud ïa ki ain jong ka ri.
