Nongstoiñ, Rymphang 15
Ka District Magistrate jong ka West Khasi Hills District ka la pynmih ïa ka hukum katkum ka Section 163 jong ka Bharatiya Nagarik Suraksha Sanhita (BNSS) kaba khang pyrshah ïa ka jingtih dewïong beaiñ bad ka jingshalan beaiñ ïa u dewïong hapoh ka District.
Ka District Magistrate ha ka kyrwoh khubor bala phah kala pynpaw ba ïa kane ka hukum la pynmih namar ka jingbteng ban pynkheiñ ïa ki jingbthah ba la pynmih da ka National Green Tribunal, ka ïingbishar ba hakhliehduh jong ka ri ka Supreme Court bad ka ïingbishar Meghalaya High Court.
Nangta, ha ka kyrwoh khubor ka District Magistrate kala ong ruh ba la lap ba ka jingtih dewïong thliew khnai ka buh jingma kaba khraw ïa ka jingim briew, ka mariang, bad ka jingsuk ha ka jingim paidbah.
Shuh shuh kane ka kyrwoh khubor la ong ruh ba ha ka jingpyndonkam ïa ka bor ba la pynkup katkum ka kyndon 163 BNSS, ka Hema Nayak, IAS, District Magistrate ka West Khasi Hills District, ka la khang pyrshah tyngeh ïa ka jingtih dewïong beaiñ hapoh u pud u sam jong ka West Khasi Hills district, ka jingshalan ïa kino kino ki jait dewïong ba la tih beaiñ hapoh ka district bad shabar ka district, bad kino kino kiba pynkheiñ ïa kane ka hukum kin shah ha ka jingpynshitom katkum ki kyndon aiñ.
Ka khubor na ka District Magistrate ka ong ruh ba la pynmih ïa ka hukum namar ka jinglong kyrkieh jong ka kam bad ka treikam noh mardor tad haduh ban da pynbna da kumwei pat.
Kumta na ka liang ka District Magistrate ka West Khasi Hills District kala kyrpad bad kyntu ïa ki paidbah bad ïa baroh ban kohnguh ïa katei ka hukum.
