Shillong, Rymphang 15
U Bah Andrew Sohlamar uba dei u organising secretary ka Bangladesh Indigenous People Forum kaba dei ka kynhun jong ki sanphew tylli ki rit paid ha Bangladesh u don jingkyrmen ba ka Bangladesh Nationalist Party (BNP) kaba la ïoh jingsynshar marwei ïa ka Sorkar ha Bangladesh kan pyntreikam ïa ki mat jingdawa jong ka seng.
U la pynpaw ka jingsngewkmen haba ka BNP kaba baroh ki paidbah ki la ai jingkyrshan ka la wan ha ka bor hadien shisnem shiteng ka jingsynshar da u Yunus.
U la ïathuh ba ka jingïakren ki nongïalam ka seng ki rit paid bad ki nongïalam ka BNP ka dei kaba la slem katba ka jingpynkhreh ïa ka ilekshon ka la ïaid.
Shuh shuh u la ïathuh ba u Tarique Rahman uba dei u khun jong ka nongïalam ka BNP ka Kheladia Zia un sa bam smai kum u Myntri Rangbahduh ka ri Bangladesh ha ka 17 tarik mynta u bnai Rymphang 2026.
U don jingkyrmen ba ka jingïadei ka India bad ka Bangladesh kan dang ïajan nangne shakhmat.
U la ïathuh ba ka jingkren u Rahman bad ki nongthoh khubor ka pyni ba ka don ka jingïadei kaba jan bad ka India lada ka India ka pdiang ïa ka jingtyrwa jong ka Sorkar BNP.
U la ïathuh ba ki jaidbynriew rit paid ha Bangladesh kiba don palat 50 tylli kynthup ïa ki Khasi ki dawa na ki seng saiñpyrthei ba kin ai jingshngaiñ ïa ki shwa ka ilekshon bad hadien ka ilekshon.
U don jingkyrmen ba ka India kan nym pyrkhing shuh ïa ka Visa lada ka jingiadei ka dang bteng bad ka Bangladesh.
Kumban shu pynkynmaw ka jingbym don shuh ka jingïadei hapdeng ka ri India bad Bangladesh naduh ba la khyllem ka Myntri Rangbah barim ka Sheik Hasina bad la thung ïa u Muhammad Yunus kum u chief adviser ban synshar ïa ka ri Bangladesh naduh ka 8 tarik Nailar 2024.
