Bengaluru, Rymphang:
Ka sorkar Karnataka ka la pdiang sngewbha ïa ka rai jong ka Supreme Court ha ki jingïakajia halor ka jingshim jaka. Katkum ki jingtip ba bniah ba la ai da ka Sorkar jylla, kane ka jingbishar ka dei ka mawjam kaba kongsan ha kaba ïada ïa ka pisa paidbah bad ban pynthikna ïa ka jingpyndonkam hok ïa ki na ka bynta ka jingbha jingmiat bad ka jingroi jingpar jong ki paidbah ka Karnataka.
Ha ka lah sngi U Blei, ka Supreme Court ka la pynmih ïa ka rai kaba kongsan bha kaba la ailad ïa ki 530 tylli ki jingujor kiba ïadei bad ka jingshim jaka. Kine ki jingkyrpad ki ïadei bad ka jingshim jaka na ka bynta ki jingpynlang um kiba heh bad kiwei kiwei ki projek, la ong ka sorkar.
Hadien ba ki Ophisar shim jaka ki la ïoh jaka na ka bynta ki projek paidbah bad ki projek pynroi bapher bapher, ki trai jaka ki la leit sha ki ïingbishar Civil (Reference Court) ban pan ïa ka jingsiew kaba kham heh palat ïa kaei kaba la ai da ki Ophisar shim jaka.
“Ha kiba bun ki mukotduma, ki Reference Court ki ai ïa ki jingpynheh kiba palat bad kiba don jingkylli, bunsien khlem da kdew ïa ka dor ïew kaba dei ne ki dor jingïalam kiba ïadei.Ban tuklar ïa kine ki khusnam, ka sorkar jylla ka la mudui ïa ki jingujor hakhmat ka Ïingbishar ba hakhlieh duh katkum ka kyndon 74 jong ka Right to Fair Compensation and Transparency in Land Acquisition, Rehabilitation and Resettlement Act, 2013.
Hynrei kiba bun ki jingujor la weng noh da ka High Court halor ka nongrim ba ka jingpynslem palat ïa ka 120 sngi kam lah ban shah katkum ka aiñ jong u snem 2013. Kumta, ka HC ka la kyntait ban bishar bniah ïa ki jingbha jong ki mukotduma bad ka la pynskhem ïa ka jingsiew bai lutksan ba la pynkiew da ki Reference Court,” ong ka sorkar.
Da kaba pyrkhat ïa ka jingktah kaba jur ha ka liang ka pisa tyngka ïa ka pla tyngka jong ka jylla, ka sorkar Karnataka, ka Karnataka Neerawari Nigama, bad kiwei kiwei ki la tuklar ïa kane ka jingbatai hakhmat ka ïingbishar ba hakhliehduh, bad la shah ïa ki jingujor.
“Haba ai jingpyllait ïa ka jylla, ka ïingbishar ba hakhliehduh ka la pynpaw ïa ka jingsngewkhia kaba jur halor ka rukom pynslem ban ujor ïa ki jingujor ha kylleng ka ri,” ong ka sorkar.
Ka ïingbishar ba hakhliehduh ka la bthah ïa ki bor synshar jylla ban buh ïa ki lad pynïaid, jingpeit bniah, bad jingkitkhlieh kiba treikam bha ban pynthikna ba ïa ki jingujor yn ujor hapoh ka por ha ki por ban wan.
“Ka sorkar ka dang don ha ka jingpyntreikam ïa ka rukom treikam kaba khlaiñ bad ki Software System ba kyrpang ban ïada na ka jingpynslem ha ki kam shim jaka bad ki jingpynrung kot sha ka ïingbishar, ban pynthikna ba ki marpoh khyndew jong ka jylla kim dei ban shah ktah ha ka jingma ha ka liang ka pisa tyngka namar ki jingbakla ha ka liang ka synshar khadar,” ong ka kyrwoh.
