Shillong, Rymphang 15
Ki katto kattne ki samla bym shym la ïoh shuh ban thoh exam ha ka kam DSC, East Khasi Hills District kaba la long ha ka 14 tarik u Rymphang 2026, ki la pynrem jur ïa ki nongpynïaid ki bym shym la shah shuh ïa ki ban rung shapoh.
Kine ki samla kiba la duh noh ban thoh ïa ka tei ka exam jong ka DSC, ki dei kiba ngat ban thoh ha Mawkhar Christan Higher Secondary School, Shillong.
Haba ïakren bad kine ki samla ki la ïathuh ba ka por thoh exam ka Sorkar ka la buh beit thik 9:00 mynstep hynrei ki nongpynïaid ha katei ka jaka thoh exam pat ki la buh ka por 8:30 bad ka la pynbitar ïa ki namar ba kim shym la ïoh rung shuh bad la shah khang noh.
Ki tei ki samla ki la ïathuh ba ki la poi ha Mawkhar ha kapor 9 duna eiei mynstep hynrei ki la shah beh noh da kaba ong ba ki la wan slem palat katkum ka por ba la buh.
“Ka por kam dei kumba la buh ha Mawkhar CHSS 8:30 hynrei ha ka Admit Card la buh beit thik 9:00. Ngi pynpoi 9 duna eiei ban thoh ïa ka exam hynrei la shah khangnoh ha ki nongpynïaid” la pynpaw ki samla thoh exam.
Shuh shuh ki la ong ruh ba ka por ba la ai hapoh Admit Card bad ka por ba pynïaid ha Mawkhar CHSS ka la ïaid la ka jong. Kumta ki la pynrem ïa ka ïa ka nongpynïaid ha Mawkhar.
