Shillong, Rymphang 15
U Myntri ka tnat pule-puthi, uba dei ruh u MLA ka Amlarem Konstitwensi, u Bah Lahkmen Rymbui ha ka Sngi Saitjaiñ, u la leit jngoh ïa ka shnong Kyrweng, ha kaba u la aiti ïa kawei ka kali kaba la mang kyrpang na ka bynta ban kit ïa ki khynnah pule na Kyrweng sha Muktapur.
Kane ka sienjam ka thmu ban pyntikna ba ki khynnah kin ïoh ïa ka jingpule kaba shngaiñ bad kaba tikna, khamtam ha ka por lyiur kaba buh jingeh ha ka leit ka wan.
Haba kren sha ki paidbah, u Bah Rymbui u la kyntu ïa ki nongshong shnong ban ym pyndonkam bakla ïa katei ka kali bad ban jur ba ka dei ban shakri beit thik ïa kaei kaba la thmu.
Ha kajuh ka por, u la kyrpad ïa ka Dorbar Shnong ban shim ïa ka jingkitkhlieh kaba pura na ka bynta ban kitkhia bad pynbit-pynbiang ïa ka kali khnang ban pyntikna ïa ka jingmyntoi (jong ka) na ka bynta ki khynnah pule.
Ha kane ka sngi, u Myntri u la sam ruh ïa ki ‘Work Order’ kiba kot sha ka T.5 lak na ka bynta ban tei shuh ïa ki kamra klas ha Kyrweng LP School.
La khmih lynti ba kane ka projek kan pynbha ïa ka jaka pule bad ban pdiang ruh ïa ka jingbun jong ki khynnah skul.
Nalorkata, la mynjur T.1 lak na ka bynta ban shna ïa ka paiñkhana skul, kaba pynpaw ïa ka jingdonkam jong ka jingkhuid-jingsuba bad ka koit ka khiah jong ki paidbah.
Da kaba ai jingkyrshan ha ka liang ka roi ka par sha ka shnong Sankhat, u Bah Rymbui u la aiti ïa ki ‘Work Order’ kiba shongdor T.5 lak na ka bynta ban shna ïa ka surok shnong. La mynjur shuh sa T.2 lak na ka bynta ban tei ïa ka kynroh ha RC Sankhat.
Shuh shuh ha kane kajuh hi ka sngi, la aiti ïa ka kali ‘Maruti Super Carry’ sha ka shnong Khonglah ban kyrshan ïa ka jingpynkhuid ïa ki jaboh jabaiñ bad ban pynkhlaiñ ïa ki jingthmu jong ki kam ba ïadei bad ka jingpynkhuid jong ka Dorbar Shnong.
Da kaba pynpaw ba ka khuid ka suba ka long kaba kongsan na ka bynta ka roi ka par baroh kawei, u Myntri u la pynpaw ka jingkyrmen ba kane ka jingthmu kan kyntiew ïa ka jingsngewthuh bad ai mynsiem ïa ka imlang-sahlang ban pynneh-pynsah ïa ka mariang kaba khuid ba suba bad kaba koit ba khiah na ka bynta ki pateng ban wan.
