Shillong, Rymphang 15
Ka Bharatiya Janata Party (BJP) kaba ïatreilang ha ka Sorkar MDA kaba la lamkhmat da ka NPP kala pynpaw ba kam donkam satia ïa u Myntri Rangbah ka Jylla Conrad K Sangma ba un hiar shuki namar ka jingbthei ka par tih dewïong beaiñ ha Mynsngat-Thangsko, East Jaiñtia Hills, kaba la shim ïa ka jingim ki 32 ngut ki nongbylla.
U Nongaiktien ka BJP Bah M Kharkrang ha ka sngi Thohdieng u la pynpaw ba ka BJP kan ap ïa kaei kaba mih na ka Judicial Inquiry Commission bala thung da ka Sorkar ban tohkit ïa kaei kaba jia ha Mynsngat-Thangsko haba ban jur ba ka Sorkar kala leh ïa kaei kaba donkam.
Haba kren sha ki lad pathai khubor, u Bah Kharkrang u la ong, “Ka Sorkar kala kubur ba kine ki jingjia kila jia, bad nga tharai kan bha ïa ngi ban ap ïa ka jingtohkit ba kan dep.”
Halor ka jingdawa ba u Myntri Rangbah u dei ban iehnoh ïa ka tnad Mining, u Bah Kharkrang u la ong, “Phim lah ban don ïa u Myntri Rangbah u ban shu iehnoh ïa ka kam tang namar ki jingjia kiba jia. Ka Sorkar kala leh eiei halor kane, kane ka dei kaba kham kongsan ban ïa kaba iehnohkam”.
Haba kylli, u la ong, “Ki pulit kila register ïa ka case bad kila kem ruh ïa ki briew. Ka Sorkar kala thung ïa ka Commission of Inquiry bad to ngin ïapeit ïa ki kyndon treikam ba la buh ïa kane ka Commission namar baroh kiei kiei ki shong ha ki kyndon treikam”.
U la kren halor ka jingshimkhia ba mar mar jong ka Sorkar Pdeng bad ong “Mar mar tang hadien ka jingjia, u Myntri Rangbahduh jong ngi bad u Myntri ka tnad Kam Pohïing kila kren ïa u Myntri Rangbah ka Jylla jong ngi ban tip ïa kaei kaba jia”.
