Chennai, Rymphang:
Shi sngi hadien ba u Treasurer jong ka seng AIADMK u Dindigul C Sreenivasan u la pynpaw ba ki nongïalam ka BJP ki dang ïakren ban ïatreilang bad ka DMDK, u president ka seng BJP ha Tamil Nadu u Nainar Nagenthran ha ka sngi Balang u la ong ba ki nongïalam ka DMDK ki lah ban ïashim bynta ha ka jingïalang paidbah jong u Myntri Rangbahduh ka ri u Narendra Modi kaba la buh ban long ha Madurai ha ka 1 tarik u Lber.
Haba kren sha ki lad pathai khubor ha kane ka sngi, u Nagenthran u la ong ba ka BJP kam shym la dawa ïa ka jingïapynbeit ban ïasam bor bad ka AIADMK.
“Ka jingthmu jong ngi ka long ba ka NDA ka dei ban wan ha ka bor synshar ha Tamil Nadu. Kano kano ka seng ha ka jingïateh lok kaba ïoh ïa ka jingbun paid kan thaw ïa ka sorkar,” u la ong bad bynrap ba ka NDA kan jop 200 tylli ki seat ha ka dorbar thawaiñ namar ki briew ki sngewsih ïa ka sorkar DMK namar ki mat kum ka jingkiew jong ka jingma ïa u drok bad ka jingkiew ka bor khajna bad ka jingpynïaid beit ïaid ryntih.
Haba kynthoh ïa ka jingkyntait jong u Myntri Rangbah ka Jylla u MK Stalin ïa ka jingdawa jong ka Congress ban ïoh bynta ha ka bor synshar, u Nagenthran u la ong ba ka DMK ka la shah bat ha ka jingtieng halor ka jingkyrmen jong ka ha ka jingïakhun ilekshon.
“Ha ka histori jong ka, ka DMK kam shym la wanphai biang ha ka bor ar sien lynter. Namar kane, u Myntri Rangbah u la kynthoh kumne shaphang ka jingthaw ïa ka sorkar synrop.”
Shuh shuh, u Nagenthran u la ong ba da kaba ïai beh ban ïoh bynta ha ka bor synshar, ka Congress ka wad ïa ka daw ban mih noh na ka kynhun synrop ba la ïalam da ka DMK.
