Bhubaneswar, Rymphang:
Ka thaiñ Gandhamardan ha Bargarh bad Balangir distrik kan long kaba lait na ki lehnoh Maoist hapoh u bnai Lber mynta u snem, la ong u Additional Director General (ADG) jong ki kam pyrshah Naxal u Sanjeeb Panda hangne ha ka sngi Balang.
Haba kren sha ki lad pathai khubor ha ka jingleit jong u sha Bargarh, u Panda u la ong ba ki jaka ba khlaiñ jong ki Maoist ha Odisha ki la sdang ban pra. Hadien ka jingleit pyndem bad pynduh bor ïa ki katto katne ngut ki nongïalam ba shyrkhei jong ka Naxal, ki kam jong ki Maoist mynta ki la sahkut bunsien ha ki jaka ba rit ha ki khappud hapdeng ki distrik jong ka Kandhamal, Kalahandi bad Rayagada nalor ki lum Gandhamardan.
“Ban pynkhuid ïa ki lehnoh kiba dang sah hapoh ka por ba la buh jong u bnai Lber 2026, ngi la pynkynriah noh ïa ka jingpyrkhat jong ngi sha ka thaiñ Gandhamardan. Ngin sa pynjari shuh shuh ïa ki bor, pynkhlaiñ ïa ka kynhun wad bniah jong ngi bad pynjur ïa ki kam shen. Ka jingïalang bishar bniah ha kane ka bynta la dep ban pynlong ha kane hi ka sngi,” la pyntip u ADG.
Ka Gandhamardan Hills, kaba don harud khappud jong ka Chhattisgarh hapdeng ka Bargarh bad Balangir distrik, ka la long la slem bah kum ka ktem jong ki Maoist kiba hap hapoh ka Balangir-Bargarh-Mahasamund Division. U Panda u la ong ba ka jingkhynra lang kaba heh bha ka dang ïaid ha ka jingïatreilang bad ki shipai CRPF, ki Special Operation Group (SOG), ki District Voluntary Force (DVF), bad ki kynhun wad bniah. La pynlong ruh ïa ka jingpahara kaba tyngeh ha ki khappud Odisha-Chhattisgarh bad ha ki distrik ba marjan.
U la ong shuh shuh ba ki kam pyrshah Maoist kiba jur ki dang ïaid shakhmat ha Odisha katkum ka jingpynbna jong u Myntri ka tnat ki kam pohïing jong ka sorkar pdeng u Amit Shah ban pynlong ïa ka ri kaba lait na ka jingleh donbor jong ka kynhun Left hapoh ka 31 tarik u Lber, 2026. Ki pulit jong ka Odisha ki pyrshang tyngeh ban pynduhjait ïa ka jingdon jong ki Maoist ha ka jylla hapoh ka por ba la buh.
Haba pynpaw ïa ka polisi leit pyndem bad pynbha pat ba la pynkylla da ka sorkar jylla, u ADG u la ong, “Bun ki Maoist mynta ki buh tiar bad ïasoh bad ka kynhun ba kongsan. Ka sorkar ka ai ïa baroh ki jingkyrshan bad jingmyntoi kiba donkam sha kito kiba iehnoh ïa ka jingleh donbor.”
U la kyrpad ïa ki Maoist kiba dang sah kiba treikam ha ki jaka ba kham rit jong ka Odisha ba kin ïoh ïa ki jingmyntoi na ka polisi bathymmai, ban aiti noh da kaba suk, bad ban pynïasoh biang bad ka imlang sahlang.
Ha kane ka jingïalang bishar bniah la leit ban ïashim bynta da u IG (operations) u Deepak Kumar, u IG ka Northern Range u Himanshu Lal, u DIG jong ka Special Intelligence Wing u Akhileshwar Singh, u SP ka Bargarh u Prahlad Sahai Meena, bad u SP ka Balangir u Abhilash G.
