Shillong, Rymphang 16
Ka Sorkar Jylla ha ka sngi Nyngkong, kala pynbna ban pynlong ïa ka ilekshon MDC sha ka Ïingdorbar ka Garo Hills Autonomous District Council (GHADC) ha ka 10 tarik Ïaïong.
Ïa kane la pyntip da u Myntri Sorkar Bah Wailadmiki Shylla haba kren sha ki lad pathai khubor hadien ba la wai ka jingïalang jong ka Kynhun Myntri ba la pynïaid da u Myntri Rangbah ka Jylla Conrad K Sangma.
U Bah Wailad u la pyntip ba ka sngi thep vote ban jied ïa ki kyrtong ban ïakhun kan long ha ka 10 tarik u Ïaïong, 2026 katba ka sngi ban ñiew ïa ki vote pat kan dei ha ka 14 tarik Ïaïong. Shuh shuh u Myntri u la pyntip ba ka sngi ban pynmih ïa ka jingpynbna paidbah kan long ha ka 9 tarik Lber katba ka sngi ba khatduh ban thep kyrteng ki kyrtong kan dei ha ka 16 tarik Lber.
