Jowai, Rymphang 16
Ki nongïalam shnong ryngkat ki nongshong shnong ka Huroi bad Lahalein ha ka jingïakynduh ïa u Deputy CEM jong ka Jaiñtia Hills Autonomous District Council (JHADC) ha ka 16 tarik Rymphang, kila dawa ban pyndam hapoh 2 taiew ïa ka jingpynbna ne Notification ba la pynmih ha ka 28 tarik Kyllalyngkot 2026 ban ithuh ïa ka Umpyrshin kum ka shnong kaba hap hapoh ka Elaka Rymbai.
Ïa kane ka jingpynbna la pynmih da ka JHADC, la pynkylla ïa ka dong Umpyrshin kum ka shnong bad ai sanad ïa u Johny Suchen ban long u Waheh Shnong ka Umpyrshin, ong u Waheh Shnong barim ka Huroi Ma Ham Lamurong haba kren sha ki lad pathai khubor.
U Ma Ham u la ong ba ha ka jingshisha ka Umpyrshin ka dei tang ka kyntoit ne dong kaba dang hap hapoh ka shnong Huroi, East Jaiñtia Hills District.
Haba pynshai halor kane, u Ma Ham u la ong ba naduh mynshwa tang ka shnong Huroi bad Lahalein kiba don ha katei ka thaiñ, lait na ka Lejri bad ka Hingaria ym pat ju don ka shnong kaba kyrteng kum ka Umpyrshin.
U la ïathuh ruh ba ka jaka kaba la kam ba ka dei ka Umpyrshin, ka dei ka jaka jong ka shnong Lahalein kaba la ai sngewbha sha ka shnong Huroi.
U la ong ba la don kumba 70-73 tylli ki longïing kiba sah ha dong Umpyrshin haduh u snem 2026, na ki 70-73 tylli ki longïing, 50 tylli ki longïing ki kyrshan ïa ka Huroi bad pynithuh ïalade kum ki nongshong shnong ka Huroi.
Shuh shuh u la ïathuh ba ha ki snem 1970 u (L) Ril Nongpluh uba dei u kpa jong u Johnny Suchen bad u nongshong shnong jong ka shnong Huroi u la sdang ban rep ha katei ka jaka, hynrei ha u snem 2000 u Johny Suchen u la kam kum u Waheh Shnong ha katei ka jaka bad na ka liang ka Dorbar shnong Huroi kumjuh ka Elaka Rymbai kila rai pynrem ïa u bad ha u 2004 la rai pynrem ïa u da ka kashari jong ka District Council.
Kitei ki nongïalam shnong kila ong, katkum ka ‘The Jaiñtia Hills Autonomous District (Establishment of Elaka and Village and Election, Appointment, Powers, Functions and Jurisdiction of Dolloi/Sirdar and Waheh Shnong) Act, 2015, ban seng ïa kano-kano ka shnong donkam ka jingïamir jingmut na ka ophis jong u Dolloi ka Elaka Rymbai, hynrei ha kaba ïadei bad ka Umpyrshin, ka District Council kala ïaid lait ïa ka aiñ bad kam shym la bud ha kaba ym don jingai jingmut jong u Dolloi ban seng shnong ïa ka Umpyrshin. Kumta kitei ki nongïalam shnong jong ki ar shnong kila dawa ïa ka council ba dei ban pyndam hapoh ar taiew ïa katei ka jingpynbna lym kumta kin ïaid da ka lynti jong ka aiñ.
