Nongstoiñ, Rymphang 16
Watla ka rep synsar ka dei kawei ka bynta kaba kongsan ïa ki longïing bad ki nongrep jong ka thaiñ Ri Mulliang ha West Khasi Hills na ka bynta ka ïoh ka kot bad pyndap ïa ka ïing ka sem, ki khun kti hynrei kumba long mynta ki nongrep synsar jong ka thaiñ ki la sngewduh mynsiem namar ka jinghiar jong ka dor ka mur u synsar.
Halor kane ka jingeh jong ki paidbah nongrep synsar, haba ïakren bad u Bah K Pangniang, uwei na ki riew rangbah katei ka thaiñ, u la ong, ha ka jingshisha ki nongrep ki la sngewnguh ïa ka Sorkar ba kala pynlong ïa une u mar rep ym shuh u mar khlaw ha kaba ha ki ar snem bala dep ka dor ka mur kala ïaid ïew bha ha katei ka thaiñ haba die bad shalan khamtam ha Assam kata ha ïew Hahim lane Boko.
Shuh shuh u la ong ruh “Mynta ka wan noh ka jinghiar kynsan jong ka dor ha kaba ym tip kaei ka daw ba ka ïew synsar ka hiar kynsan khamtam ha thaiñ Ri Mulliang ki shaniah ha ka ïew ka thaiñ khappud ka Meghalaya bad Assam bad kane ka jinghiar kynsan jong u synsar kala ktah shibun ïa ka ïoh ka kot jong ki nongrep jong ka thaiñ”.
U la ong ruh ba kaei kaba ki paidbah nongrep jong ka thaiñ ki sngew ban phai khmat sha ka Sorkar ka long ba hato ym lah mo ban shim ki lad ki lynti ba kata ka jingdie lane shalan ïa u synsar kan long kum ha ka por mynshuwa ha kaba lada u duna eh ka long san phew tyngka shi kilo ha kaba mynshuwa kala poi ruh haduh 70 tyngka shi kilo hynrei mynta ka hiar sha ki lai phew bad ar phew tyngka.
“Kane kala ktah shisha ïa ka kamai kajih ïa ka rep ka riang ïa kaba ki nongrep ha ka jingshisha ki la ïoh mynsiem naba u long uwei na ki lad jong ka jingïoh jingkot ka jong ki ha ki ïing ki sem,” ong u Bah Pangniang.
