New Delhi, Rymphang:
Ka jingïateh ha ka kam khaïi pateng kaba laitluid hapdeng ka India bad ka UK, ka lah ban treikam naduh u bnai Ïaïong mynta u snem, kaba plie lad ïa ka jingkiew jong ka jingshalan mar jong ka India sha ka ri Europe, ong u heh ophisar ha ka sngi U Blei.
Ïa kane ka jingïateh la ïasoi hapdeng kine ki ar tylli ki ri ha u bnai Naitung jong u snem ba la lah bad mynta hap ban ïoh jingmynjur da ka UK Parliament khnang ba kan treikam noh.
Ka jingtreikam ka la dep sdang da kaba sdang ïa ka jingïakren halor ka Free Trade Agreement (FTA) ha baroh ar tylli ki ïingdorbar jong British Parliament.
“Hapoh ka jingïateh ïa ka kam khaïi pateng kaba laitluid, 99 percent na ki mar ba shalan shabar ri jong ka India sha UK kin ïoh ïa ka jingmyntoi jong ka Zero Duty. Kane ka plie lad ïa ki mar shabar ri kiba heh bha na ka bynta ki bynta kiba donkam shibun ki nongtrei kum ki jaiñ, ki mar napoh duriaw, ki snieh mrad, ki juti, ki tiar ïalehkai Sport bad ki tiar ïalehkai khynnah, ki mawkordor bad ki jingdeng, bad kiwei pat ki tiar pyndonkam kin kynthup kum ïa ki tiar ba pyndonkam ki Engineer, ki tiar shna kali bad ki Engine, bad ki dawai kynbat,” la ong ka jingthoh ba la phah da u heh sorkar.
Nalor kata, ka India ka la pynthikna ba ki jingkhanglad ki bym dei ki khajna ki long kiba la pynbeit bha ban pynthikna ïa ka jingtuid laitluid jong ki mar bad ki jingshakri bad ba kin ym thaw ïa ki jingkhang kiba khlem nongrim ïa ki mar shalan mar jong ka India shabar ri.
U Myntri Rangbahduh jong ka Ri u Narendra Modi bad u nongsynshar ka Britain u Keir Starmer ki la pynbna ïa ka jingpynkut kaba jop ïa ka FTA kaba myntoi lang ka India bad ka UK ha u Jymmang jong u snem ba la lah. Ïa kane ka jingïateh kular la pynkut noh hadien ba u Modi u la ïakren bad u Myntri Rangbahduh jong ka UK lyngba ka phone.
Nalor ka FTA, la ïasoi ruh ïa ka Double Contribution Convention ban shimkhia ïa ki jingmyntoi jong ki nongbylla kiba dei ki nong India ha UK.
Kan don ruh ka jingkiew kaba khraw ha ka khaïi pateng ha ki jingshakri, kum ki jingshakri ba la pynlah da ka juk stad Information Technology, ki jingshakri ha ka liang ka pisa tyngka, ki jingshakri ba tbit, kiwei kiwei ki jingshakri ha ka kam khaïi bad ki jingshakri ha ka pule puthi.
Ka India, ka la ïoh ruh ïa ka jingpyllait na ka bynta ki nongbylla kiba dei ki nong India, kiba don shipor ha UK bad ki nongpynïaid kam jong ki, ba kin siew ïa ka bainong jong ka Social Security ha UK, na ka bynta lai snem, katkum ka Double Contribution Convention.
Kane kan pynlong ïa ki nongpynïaid ïa ki jingshakri jong ka ri India ban kham lah ban ïakhun ha UK.
Hapoh kane ka jingïateh kular, yn pynduna ïa ka dor jong ka Scotch Whiskey na ka 150 percent sha ka 75 percent bad yn pynhiar shuh shuh sha ka 40 percent ha u snem 2035.
Ka India kan sa pynduna ruh suki suki ïa ki khajna na ki kali, naduh 110 percent sha ka 10 percent ha ki san snem hapoh ka rukom treikam ba la pynshong nongrim ha ka jingbhah.
Ha ka jingsiew kylliang, ki nongshna kali na India kin ïoh ïa ka lad ban kiew sha ïew ha UK na ka bynta ki kali elektrik bad ki kali Hybrid hapoh ka kyndon ba la buh.
Ka FTA ka jia ha ka phang jong ka jingkiew ka jingïadei ha ka ïoh ka kot hapdeng ka India bad ka UK kumba la pyni nuksa ha ka khaïi pateng hapdeng ki arliang mamla kaba long kumba USD 60 billion, kaba la antad ba kan kiew ar shah ha u snem 2030.
