Kum ki briew wat la ngi riew-spah ne ngi duk katno katno ruh la ngi khlain bor kum u Padhati bad tlot bor kum u dohthli ruh ngim lah leh eiei khlem ka jingaiei ka jong u Blei. Namar ym don nongrep, ym don nongkhaïi, ym don nongïalam niam, ym don nonghikai skul, ym don nongñiah Rel ne liengsuiñ ym don nongkieng lieng bad ym don nongsynshar pyrthei bad kiwei kiwei baroh ki long tang kum u phlang u syntiew u ban tlor noh tang shiteng por.
Ka bor jongngi ki briew ka kut noh ha kane ka rta kaba tang kumba 90 snem eiei ngi ïa dei ban khlad noh na kane ka pyrthei. Ka daw ka long ba u Blei nongbuh nongthaw um shah ïa ngi ki briew ban im sah ha kane ka pyrthei. Dei na kane ka daw ba ki ong, kane ka pyrthei ka long tang ka ïing shong basa shipor. Kane ka long ka jingïaid lynti jongngi ki briew uwei pa uwei la shynrang ne kynthei. Ngi lah ban ïaleh sngewbha bad ïaleh kmen hangne ha sla pyrthei katba ngi dang khlaiñ dang shait bad dang im ha kane ka pyrthei.
Hynrei ka por kan jia ba ngi hap ban ïehnoh ïa ki baieit ba thoiñ, ki hynmen ki para, ki khun ki kti bad leit noh sha lyndet jong kane ka pyrthei bad ngim ioh lad shuh ban ioh wan phai biang sha kane ka pyrthei. Shisien ba ngi la duh noh ïa u Mynsiem uba im.U Mynsiem ula her noh na ka met doh jongngi ki briew, ka long thok kum ka ruh suda khlem u Moina bad ngi leitphai noh sha kata ka ri kaba long ka them ka jingiap ka bym ju kdang lano lano ruh, ka ïai bam ïa ka jingim jongngi ki briew, man ka sngi ha kane ka sla pyrthei. Kane ka dei ka jingim bad ka jingïap jongngi ki briew, kan wan jia ha ka jingim briew. Ka pyrthei ka dei shisha ka ïing shong basa shiteng por.
C. B. Iawphniaw
