Shillong, Rymphang 16
U Nongïalam ka Liang Pyrshah Mukul Sangma u la kyrpad ïa ka ïingbishar ba kan shimkhia halor ka jingbthei ka par dewïong dang shen ha Mynsngat-Thangsko bad pynthikna ba man ki kam beaiñ dei ban phiah la ka jong bad bishar la ka jong ha ïingbishar khnang ba kan plie lynti ïa ka jingtohkit ba laitluid.
U Mukul u la ong, “Ka jingpynslem ïa ka jingbishar hok ka dei ka jingpynduh ïa ka hok, nga khmih lynti bad nga dang don ka jingkyrmen ha ka jingstad jong ka ïingbishar ba kan shimkhia ïa kane bad shim ïa ka lynti ha kaban shim rai ka ban don ka jingpynsangeh noh mardor. Kane ka dei kaba donkam bad ban shah ïa ka jingtohkit ba laitluid.”
U Mukul u la kynnoh ba ka Sorkar ka don ïa ka plan ba sha lyndet ban shah ïa ki kam beaiñ ba kin bteng, haba ai nuksa ïa ka interim report ba 35 jong ka Justice Katakey Committee, kaba pyni ïa ka jingjur ki kam tih dewïong beaiñ.
“Lada phi kwah ban pynkut ïa kane ka jingleh beaiñ, kane ka Sorkar kan hap ban leit. Katba phi dang shah ïa kane ka Sorkar, ki kam beaiñ kin dang bteng beit, kynmaw ïa kane ka kyntien jong nga,” ong u Mukul haba bynrap ba ka jingïai kyntait jong u Myntri Rangbah halor kane ka kam hapoh ka ïingdorbar ka dei ka kam kaba sngewkhia bha.
U la pyntip ba un sa wanrah da ka resolution pyrshah ïa ki kam tih dewïong beaiñ wat hapdeng ka jingtip bha ba kane ka kam ka long sub-judice, ba ka dang don hapdeng ka jingbishar hapoh ka ïingbishar.
“Ngan sa wanrah ïa kane ka resolution ha ka ïingdorbar watla nga tip bha ba ka rule kam shah ïa nga,” ong u Mukul haba kdew ba kane ka kam ka long sub-judice.
