Shillong, Rymphang 16
Ka United Democratic Party (UDP) kaba dei ka paralok ha ka Sorkar MDA-2 ba la ïalam da ka NPP, ka la kyntait ïa ki jingdawa jong ki liang pyrshah kiba pan ïa ka jingiehnoh kam jong u Myntri Rangbah ka Jylla, u Conrad K. Sangma halor ki jingkynnoh ba don jingïadei bad ka jingtih dewïong beaiñ .
Ka seng ka pdiang sngewbha ïa ka rai jong ka Sorkar Jylla ban thaw ïa ka Judicial Inquiry Commission bad ka kynhun tohkit ba kyrpang ka SIT ban eksamin ïa ka jingbthei bom dynamite ha ka 05 tarik u Rymphang 2026, ha ka jaka tih dewïong beaiñ ha Mynsngat-Thangsko, East Jaiñtia Hills District kaba la shim ïa ka jingim palat 30 ngut ki briew.
U General Secretary ka United Democratic Party (UDP) u Bah Titosstarwell Chyne u la ong ba ka jingtohkit ka dei ban ïaid laitluid bad ba ka jingpynshitom kaba tyngeh ka dei ban bud ynda la dep ban shim ïa ka jingtohkit. U la ban jur ba dei ban pyntreikam lang ïa ka aiñ ha kajuh ka rukom pyrshah ïa baroh ki riew shimet kiba donkti lang ha ki kam tih dewïong beaiñ.
