D H Kharkongor
Shah ngan pynkynmaw biang ba ka jingshisha (Truth) kan ïaisah hi ka jingshisha wat lada ngi baroh ngi ïakyntait noh war ïa ka.Ka jinglamler ruh kan ïaisah hi ka jinglamler wat lada ngi baroh ngin ïarap lane pynitynnat ïa ka. Kaba dei (right) kan ïaisah hi kaba dei wat lada ngi baroh ngim pdiang lane ngi kyntait pynban war ïa ka.Kaba bakla (wrong) pat de ruh kan ïaisah hi ka jingbakla wat lada ngi baroh ngi leh ngi kam lane ngi kyrshan pynban ïa ka. Ngi da im pat de ruh ha ka ‘juk’ lane ha ka ‘pateng’ kaba la nang bun uba ‘thut’ pynban ïa uba ‘kren’ ïa ka jingshisha. Ym duh kiba da shun syndon hi ruh ïa uba ‘kren’ ïa ka jingshisha. Te kumta wat u briew uba ‘beit jinglong’ ruh um banse ban shu kbum noh jak ban ïa kaba ‘kren’ ïa ka jingshisha. Nangne sha khmat yn sa nang ñiar ban shem ban lap ïa uba shlan ban ‘kren’ ïa ka jingshisha.
Ngi da im shisha pat ruh ha ka juk lane ha ka pateng jong ka jingïarap pynban ban tyllep eitmiaw lane ïarap pynban ban da ‘rap jot. La hangno hangno ruh ym don jaka ïa u briew uba ‘beit’ ka jinglong jingim. Yn nym don jaka ïa u briew uba kdew ïa ki jingduna ki jingbakla, uba pyrshang ban pynbeit ïa ki jingbakla lane uba thrang ban pynkhuid ïa ka pyut ka syar. Yn nym don jaka ïa u, la ha ka kamshnong kamthaw lane ha ka kam saiñhima-sima ne wat ha ka ‘Balang’. Uba bun un nym sngewtynnad ïa u briew uba ‘iaidbeit’ lane uba ‘beit’ ka jinglong jingim. Kumta uba beit ka jinglong jingim lane uba ïengshkem ha ka ‘nongrim jong ka jingshisha’ un sa long weibriew. Kiba ‘kynriang jinglong’ kin ïaleh da kumne bad da kumtai ban kyntait noh war ïa u sharud. Ym duh ki ban ïaleh ban ‘biahpongrai’ syndon hi ruh ïa u. Kin ïaleh ban pynduh syndon hi ruh wat ïa ka ‘hok’ ka jong u.
Ngan pynkynmaw biang ruh ïa kane kawei ka jingshisha bad kata ka long ka ‘jinglong arsap’ (Hypocrisy). Ka long kumta naba nga diaw ka mynsiem ynda haba nga peit lane nga bishar lane nga sngapthuhbha ïa kane ka pyrthei. Ka kyrsoi pat de, hapoh jong nga, ka jingkyrmen ynda haba nga iohi ïa ki ‘Ingmane’ kiba lem bad la ki ‘Diengphna’ kiba ïeng kynjreng halor jong ki. Kaba katno tam ynda haba iohngew ba dang ïairiew ne dang sawakyndiang ki baje ki jong ki.Hynrei ynda haba nga rung hangta hapoh ‘Ingmane’ nga lap nga shem pynban da kata ka juh ka ‘pyrthei’ ba ka don hangta hapoh,kata, wat haba ka ïaleh ban buhrieh bha khop ïalade hadien jong ka ‘durbula’. Nga I pynban kumba kata ka ‘Pyrthei’ ka ‘sngewkhain’ ba ka ioh ban don hangta. I kumba ka la kum shim ïa kat ka ‘Ingmane’, ba la ‘pynkyntang’, ba ka dei pynban tang kum ka ‘Sunday Club’.
Nga kubur ba ym don uba ‘janai’ lane uba ‘hok’, em, ym don wat tang uwei ruh. Nga kubur ba u briew u dei hi tang u briew (mortal) ba kumta um lait ba un kum ngop noh lor bad rung jlang ha ki jingpynshoi ki jingpynshad (enticement/temptations) jong kane ka ‘pyrthei’. Ki jingpynshoi ki pynshad pat de ruh kiba da har rukom. Nga kubur ba katba u briew u dang ring mynsiem un dang ïai mad ïa ki jingtynjuh (test/trial) lem bad ïa ki jingpynshoi ki pynshad (temptations). Nga kubur ba U Blei u dei uba ïai shah slem (patience), uba dap da ka jingisnei (mercy) bad ruh uba kynrei ka jingaiei (grace). Ha ryngkat kita kiei kiei nga shem ba U Blei (Jisu /Jesus), ha kaba ïadei bad u briew, u isih ne u ijli tam eh ne u bitar tam eh tang ia ki ‘Pharisee’ lane tang ïa ka jinglong kaba ‘ar-sap’ lane ïa ka jinglen (denial) lane ïa ka jingtyllepeit-miaw ïa la ki jong ki jingduna ki jingbakla lane ki jingbymhok. Haduh mynta mynne ngam pat lap lane ngam pat shem ha ka Bible ba U Blei ne U Jisu un dumon da kaba tyngeh lane da ka jingbitar shla ïa uno uno u briew lane ïa kano kano ka briew lait na u Soitan lem bad ïa ki ‘Pharisee’ ‘ar-sap’. Nga kynmaw ruh de ba um sngewbha da leilei ruh em iakato ka jingpynlong ïa ka ïing U Kpa U jong U kum ka krem jong ki nongtuh.Nga ngeit shkem ba U Blei um lah khlem da um hi hinlin ka mynsiem ynda haba uba ‘bakla’ u kubur bad u phla shem mynsiem (confess), ïa la ki jong ki jingduna bad ki jingbakla.Kam pher hi ruh lada kan khraw kattno katno ruh.Nga ngeit shkem ba U Blei um lah khlem da isnei, kat ban map-einoh, ïa uba kum uta, uba da angnud ruh de ban phaidien noh (repent) na kita kiei kiei baroh.To shim nuksa na uto u ‘dakaid’ uba halor ka diengphna. U ‘dakaid’ uba ‘kubur’ ïa la ki jong ki jingduna bad ki jingbakla. Uba da kyrpad rit ba U Jisu un kynmaw lem ïa u ynda haba U Jisu un don ha ‘Paradise’.
Halor kitei ki nongrim ba nga ju ong ba kaba eh shisha shisha ynda haba ka la dep ïap noh ka jingïatiplem (conscience) bad ynda haba ym tieng burom shuh wat ïa U Blei uba im.Tangba ym lah pat de ban pynthame lane ban shukor ïa U Blei, kumba shulor lane pynthame ïa u parabriew.
