Shillong, Rymphang 16
Ka Sorkar Jylla kala jam shakhmat ban pyndep noh ïa ka jingthungkam ha ki 3000 tylli ki kam kiba lait ha ka tnad pulit.
“Ngi shim ïa ka jingkitkhlieh ban pynkhlaiñ ïa ka tnad pulit, ka jingpynrung kam jan kumba 3000 tylli ki kam kiba lait ka dei kaba la jan pyndep,” la ong u Lat ka Jylla u CH Vijayashankar haba ai jingkren ha ka sngi sdang jong ka Dorbar Mang Tyngka ha ka sngi Nyngkong.
“Ka jingthmu kaba hakhmat jong ka Sorkar ka long ban kyntiew ïa ka jingsuk, jingshngaiñ bad ïa ka bha ka miat jong ki nongshong shnong. Ha u snem ba la dep, ka jinglong jingman ha ka Jylla kala long kaba shongsuk shongsain, la ong u Lat bad ka bynrap ba baroh ki tamasa kynthup ïa ki jingrakhe hapoh ka ri bad ki jingrakhe ha ka Jylla ki dei kiba la ïaid beit da ka jingsuk.
U Lat u la ong, ka jingpynbiang ïa ka jaka sah ki pulit ka dei kaba la pynïaid shakhmat. “Ngi kut jingmut ban pynkhlaiñ ïa ka tnad pulit ka jong ngi, ka jingpynrung kam ïa jan kumba 3000 tylli ki kam kiba lait ka dei kaba la jan dep artad,” u la ong.
Ha u snem ba la dep, u Lat u la ong, ba bun ki jingtyrwa ban pynkhlaiñ ïa ki jingtei jong ki pulit ki dei kiba la shimkhia hapoh jong ka Police Infrastructure Renovation Fund.
Ka jingtei ïa ki 14 tylli ki Police Housing Project kala ïaid beit bad kane kan pynkhlaiñ ïa ka jingai jingshakri jong ki pulit ha kylleng jong ka Jylla, u la bynrap.
