Shillong, Rymphang 16
Ka Hynñiewtrep Integrated Territorial Organisation (HITO) ka la phah jingmudui sha u Kishan Reddy, Myntri Sorkar Pdeng ba dei khmih ïa ka tnad Mines halor ka jingpynkheiñ ka Sorkar Meghalaya ïa ki kyndon ka Mines and Minerals (Development and Regulations), Act, 1957.
Kane ka jingmudui ka dei hadien ba ka seng ka la dep ban pan jingpynshai na ka tnad Mining and Geology halor ka jingithuh ne ai jingbit ïa ki hynñiew tylli ki Cement Company ha Jaiñtia Hills ba haduh 3 klur 28 lak tam Metric Ton u Mawshun la kheiñ kum uta uba shu mih ryngkhat ne incidental limestone. Na ka liang ka HITO ha ka 09 tarik u Nohprah, 2025 ruh, ka la pan ïa ka jingpynshai na ka Sorkar Jylla ba ha kano ka khyrnit jong ka MMDR Act, 1957 la kdew ba ka Sorkar Jylla ka lah ban ai jingbit ïa kino-kino ki marpoh khyndew khamtam ïa u Mawshun uba pynlong kam da ki kharkhana dewbilat kum uta uba shu mih ryngkhat ne incidental.
Ka HITO ka ong ba na ka liang ka Sorkar Jylla haduh mynta kam pat lah ban ai ïa ka jubab bad kumta la phah jingthoh sha ka Sorkar Pdeng.
U General Secretary ka HITO, u Bah Wanbun Dkhar u la ong ba ka jingithuh ha ka thup jia ryngkhat ne incidental ïa u mawshun sha ki Cement company ka pynkha roi ïa ka jingtih mawshun beaiñ, namar katkum ka jubab RTI la lap ba ki don tang 35 tylli ki ‘mining lease’ na ka bynta u mawshun ha ka thup ‘minor minerals’ ha East Jaiñtia Hills bad 18 tylli ha West Jaiñtia Hills District katba ki par mawshun kiba pyntrei ki don da ki spah tylli.
Shuh shuh u la ong ba ka Sorkar ka hap ban leh eiei namar kane ka wanrah ïa ka jingduhnong ka Sorkar na ki khajna marpoh khyndew kum ba la sakhi lyngba ka jingmynjur ‘incidental’ ïa u mawshun da ka Sorkar Jylla.
