Shillong, Rymphang 16
Ka National People’s Party (NPP) ka la pynduh tiket ïa u Chief Executive Member (CEM) ka Garo Hills Autonomous District Council (GHADC) u Albinush Marak, da kaba pynpaw ïa ka jingartatien ba un dang jop biang ha ka ilekshon ban wan.
U Albinush Marak u ba long kum u CEM u dei u ba mihkhmat na Siju Constituency bad ha kane ka kynti ka NPP ka la ai tiket ïa u Calis G Momin kum u kyrtong ban ïakhun sha ka ilekshon MDC ha GHADC.
Haba kren sha ki nongthoh khubor ha ka sngi Nyngkong, u Working President ka NPP bad Myntri Sorkar u Marcuise N Marak u la ong ba ka party ka la pynduh tiket ïa u CEM ba mynta ka GHADC namar ka jingartatien ba un dang jop ha kane ka ilekshon katba ka party ka kyrpad ïa u ba un ai ka jingkyrshan bad ka jingïatreilang bad ka party. U Marcuise ula ïathuh ba ka party ka la pyllait ïa ka thup ba nyngkong jong ki 24 ngut ki kyrtong ban ïakhun sha ka ilekshon GHADC ban wan, ïa kiba la jied da ka jingkhmih bniah ba ki kyrtong ki long kiba lah ban jop kiba ïai-neh bad kiba shemphang ha ka saiñ pyrthei ha ki snem ba la leit.
Haba bynrap u la ong ba ka State Election Committee, ba ïalam da u Bah Prestone Tynsong, ka la ai jingmynjur ïa ka thup kyrteng hadien ka jingai jingmut jong ka Regional Committee, kumjuh u National President ka NPP u Conrad K Sangma bad kiwei ki Nongïalam ba rangbah ka party, ki la ïakynduh markhmat ïa ki kyrtong kiba pan tiket.
