Shillong, Rymphang 16
Ka Hynñiewtrep Youths Council (HYC) ka pynrem jur bad kyntait ïa ka jingkren ba dang shen jong u Bah Vincent H Pala, President ka MPCC, da kaba kam ba “U pud u sam Indo-Bangladesh ka la shngaiñ bad biang pura bad ka jingtieng ïa ka jingwan tuid ki briew ka long tang ka jingmutdur.” Kum kane ka jingkren kam dei tang ba ka long kaba khlem jingkitkhlieh hynrei kaba ïalam bakla.
“Ban kam ba u pud u sam u long uba la biang pura ka long ka jingñiew beiñ ïa ki trai ri trai muluk jong ka Meghalaya, kiba la sakhi ïa ki jingrung be-aiñ kiba ïai bteng ha ki jaka jong u pud u sam jong ka Indo-Bangladesh. Ka jingleh thok ïa ki kot ki sla, ki Aadhaar thok, ki ID nongthep vote bad kiwei-kiwei de. Ka jingwan rung tuh na ki jaka khlaw bad ka jingdon jong ki briew kiba la suba ba ki dei ki nongshong shnong be-aiñ bad ka jingkiew ha ka jingbun briew ha ka Jylla” la ong ka HYC ha ka kyrwoh ba la phah ha ka sngi Nyngkong jong ka taïew da u President, u Bah Roykupar Synrem.
U Bah Roykupar Synrem u la buh jingkylli ruh ba lada ka thaiñ khappud ka dei shisha kaba la biang bad shngaiñ pura, balei ka don ka jingïai bteng ban kurup, kem bad ban phah leit phai biang ïa kiba wan rung tuh ka dang ïai jia? Balei ki nongshong shnong ha khappud bad ki sengbhalang ki ïai bteng ban long kiba peitngor?.
U la kynnoh ruh ba u Bah Pala u la ai mynsiem pynban ïa ka kam rungtuh bad ban pynduna noh ïa ka jingsheptieng kaba shisha.
“Ban pynduh ïa ka jingsyier jong ki paid trai ri trai muluk kadei tang ka jingïalam bakla bad ka dei tang ka jingpynsngewthuh bakla ïa ka jaidbynriew kaba ïakhun na ka bynta ban ïada ïa la ka jaka, jinglong trai bad ïa ka hok ha ka kam saiñ pyrthei” la ong u Bah Roykupar.
U Bah Roykupar Synrem u la buh jingkylli biang ruh, ba u ai jingmyntoi ïano ban kren kumtei, hato kane ka dei ka jingpyrshang ban leh politik ïa ka jingma kaba shisha jong ka ri bad ïa ka mat jingïakhun ka jaidbynriew? Ka jingkren u Bah Pala ka la buh ïa u bad ïa ka seng ha ka jinglehraiñ hakhmat jong ki jaidbynriew trai ri ka Jylla Meghalaya bad ka la pynkynmaw ïa u, ba ym shym la kren na ka bynta ka Sorkar.
Kumta u ong “Ka jingïakhun ban neh ban sah ki jaidbynriew trai ri ka Meghalaya kam dei satia tang ka jingmutdur. Kadei ka jingshisha kaba dawa ban leh da ka kam”.
