Shillong, Rymphang 16
U Myntri Rangbah ka jylla Conrad K Sangma ha ka sngi Nyngkong u la pyntip hapoh ka ïingdorbar thawaiñ ka jylla ba ki Enforcement Team kila dep ban pynpra haduh 6 tylli ki Crane ne kali khwai kiba la pyndonkam ha ka jingtih dewïong beaiñ bad kila kurup 6 tylli ki trok kiba kit ïa u dewïong hadien ka jingjia ka jingbthei ka par dewïong ha ka 5 tarik Rymphang ha Mynsngat-Thangsko, East Jaiñtia Hills.
“Ki kam ban pynduh bad pynjulor ïa ki Crane bad ka jingkurup ïa ki kor bad ïa ki mashin tih dewïong beaiñ kala sdang, ha kaba baroh 6 tylli ki Crane la dep ban pynjulor, kila don baroh 6 tylli ki kali kiba la pyndonkam ha ka ban kit beaiñ ïa u dewïong kiba la ïoh ban kurup haduh ka 13.02.2026,” la pynpaw u Conrad ha ka suo-motu statement ha ka dorbar mang tyngka kaba sdang ha ka sngi Nyngkong.
“Nalor kane ki pulit kila pyndonkam ruh da ki Drone ban khmih bniah ïa ki kam ki jam jong ka jingtih dewïong beaiñ,” u la bynrap. U Conrad u la pynpaw ruh ha kaba ïadei bad ki bynta jong ka jingsei ïa ki met, ha kaba ha ka sngi kaba nyngkong la sei 18 tylli ki met, 4 tylli ha ka 6 bad 7 tarik u Rymphang. Lah ïoh sei ïa ki 8 ngut kiba mynsaw bad hadien 4 ngut kila khlad noh ha ki hospital ha Shillong bad Guwahati. La ïoh jingtip ba kila don 2 ngut kiba la khlad ïa kaba la pyntip da ki bahaïing bahasem ha ka 6 tarik u Rymphang bad ïa kane la pynshisha kaba la pynlong ïa ka jingïap jong baroh ban kot sha ka 33 ngut. Ïa ka jingwad la pynkut noh ha ka 9 tarik u Rymphang.
U la ong, ba ïa ka jingsiew ïa ka ex-gratia kaba kot T.24 lak la dep ban aiti sha ki 8 tylli ki longïing bad ïa kiba dang sah ka kam ka dang ïaid shakhmat.
“Ki kam ban pyllait ïa ka ex-gratia sha ki bahaïing bahasem kiba dang sah, ka dang ïaid shakhmat mynta, ha kaba kala don ka jingïakren bad jingïapyntip bad ki bahaïing bahasem ban ïoh ïa ki jingtip kiba donkam”.
Ka suo-motu FIR ka dei kaba la dep ban rejistar bad ka Special Investigation Team kaba la khlieh da u DIG (Eastern Range) la dep ban thaw bad haduh mynta kila don 7 ngut kiba la shah kem.
Nalor kane, 62 tylli ki ejahar halor ka jingtih beaiñ, 57 tylli hadien ba kala mih ka jingbthei, sa 5 halor ka jingkhaïi beaiñ bad 2 tylli ha kaba ïadei bad ka jingbthei kaba la pynmih ruh ïa ka jingkem ïa ki 14 ngut baroh bad ki bor kiba dei khmih kila dep ban kurup 15,224.72 metric ton u dewïong. U Myntri Rangbah u la pyntip ba ka District Task Force kaba la khlieh da u Deputy Commissioner kaba kynthup ïa u Superintendent of Police, DFO (Territorial), District Transport Officer, District Mining Officer bad kiwei kiwei ki ophisar kala khmih bniah bad peitngor ïa katei ka jingjia bad kila shim ïa ki sienjam ban tehlakam ïa ka jingtih bad jingkhaïi beaiñ ïa u dewïong.
Kine ki kynthup ïa ka jingkurup ïa u dewïong uba la tih beaiñ, ka jingïoh ïa ki tiar pynbthei, ka jingpynjari ïa ka kyndon 163 BNSS, ka jingpynduh ne pynjulor noh ïa ki Cranes bad ïa ki mashin bad ki kor ki bor ha ki jaka tih ban ïada na ka jingsdang biang ïa ka jingtih beaiñ.
“Ha ka jingtohkit kaba mardor la ïoh jingtip ba ka jingbthei ka lah ban dei namar ka jingpyndonkam ïa ki tiar pynbthei ha ka jingtih beaiñ. Kane ka jingjia kala lam sha ka jingïap jong kiba bun bad ka jingmynsaw bad bun ngut kila sahkut hapoh jong ka par tih dewïong,” u la pyntip bad ïathuh, “Ka jinglong jong ka jaka tih, kynthup ïa ka jingbym biang ka jinglong ka khyndew, ka jingtih ïa ki thliew shapoh bad ka jingdon ïa ki mashin bad ki tiar pynbthei, ka buh ha ka jingma kaba khraw ïa kiba sahkut bad kumjuh ruh ïa ki kynhun nongleit ïarap ban wad ïa ki”.
Ka jingmana hapoh jong ka BNSS Section 163 mynta kala treikam ruh ha ki jaka tih, 5 tylli ki kynhun khynra kila treikam bad 6 ngut ki ophisar, 8 ngut ki sub-inspector bad 4 Platoon ki pulit la phah sha katei ka jaka.
U Conrad u la ong, ka District Task Force kala bteng ban ïatreilang bad ki bor kiba dei khmih bad ki jingkhynra kiba man la ka sngi ryngkat bad ïa ka jingkurup.
“Ha u snem 2025, kila don baroh 4 tylli ki case kiba la rejistar ha kaba ïadei bad ka jingtih dewïong beaiñ, ïa kaba la lap lyngba ka jingpyndonkam ïa ki Drone. La kurup baroh 11,182 MT u dewïong beaiñ, kynthup lang ïa ki kor ki bor kum ki Cranes bad Generator, kiba la pyndonkam ha kaban tih beaiñ ïa u dewïong,” la bynrap u Myntri Rangbah.
