Kyiv, Rymphang:
Ka tnat pyrshah bamsap jong ka NABU jong ka Ukraine, ha ka sngi U Blei, ka la ong ba ka la kem ia u myntri barim jong ka tnat bor ding jong katei ka ri, u German Galushchenko, u ba la iehnoh kam ha u snem ba la dep, ha ka por ba don ka jingjia bamsap kaba jur bha, katba u dang pyrshang ban iaid lait ia u pud u sam jong ka Ukraine.
“Mynta ka sngi, katba ki dang ïaid lait ïa u pud u sam jong ka jylla, ki nongtohkit jong ka NABU, ki la kem ïa u Myntri barim jong ka bor ding kum shi bynta jong ka mukotduma ‘Midas’,” la ong ka NABU ha ka kyrwoh, haba kdew shaphang ka jingjia bamsap kaba khraw ha ka tnad bor ding jong ka ri kaba la pynkhihwin ïa ka Ukraine ha u snem ba la dep.
Kam shym la jer kyrteng ia u Galushchenko ha ka jingpynbna jong ka, hynrei u la bat ia ka kam kum u myntri ka tnat bor ding jong ka ri ha u snem ba la dep bad u la iehnoh ia ka kam ha u Naiwieng.
“Ka jingtohkit ba nyngkong ka dang ïaid shakhmat, la pynlong katkum ki jingbthah jong ka aiñ bad ki jingpynjari jong ka ïingbishar. Ki jingtip ba bniah kin bud,” la bynrap shuh shuh ka NABU.
U Galushchenko u dei uwei na ki katto katne ngut ki myntri kiba la iehnoh kam ha u snem 2025 haba ka NABU ka la pynpaw ïa ka buit thok pisa kaba heh bha ha ka liang ka bor ding jong ka ri kaba ki nongtohkit ki ngeit ba la pynlong da u paralok jong u President Volodymyr Zelensky jong ka Ukraine.
Ka NABU ka la ong ba ki nongthmu ki la pynlong ïa ka skhim ai pisa kaba $100 million ban shim kabu ïa ka pisa, kaba la pynmih ïa ka jingbitar jong ki paidbah ha ka por ba la pynduh bording ïa ki paidbah namar ka jingshah thombor jong ka Russia.
Ki nongtohkit ki la ong ba u Galushchenko u la ïoh ïa ki “jingmyntoi shimet” kum ka jingiohnong na katei ka kam shukor.
Ka Ukraine ka la shah ktah slem bha ha ka bamsap bad ka jingpynkhreh ïa ki kam bamsap la ïohi kum ka jingdonkam ba kongsan jong ka jingthmu jong ka ban rung sha ka European Union.
