Hyderabad, Rymphang:
Ki 21 ngut ki nongbylla bar jylla kiba dei na ka jylla Chhattisgarh ki la shah pyllait im na kawei ka jaka shna maw-it ha Peddapalli distrik hadien ka jingkynnoh ba ki shah pyndonkam bakla bad shah lehbeiñ ha ki trai jong kane ka jaka trei jong ki.
Kat kum ka jingïathuh jong ki heh pulit, la ong ba ka Labour Department jong ka Chhattisgarh ka la phah ïa ka shithi kaba thikna sha u Peddapalli District Collector ha kaba ka la pynpaw ïa ka jingsngewkhia halor ka jinglong jingman bad ka jingshah leh jong ki nongtrei. Da kaba pyntreikam halor katei ka jingujor, ka bor pynïaid distrik ka la tuklar bad sdang ïa ka jingkhynra lang.
Halor ka jingbthah jong u Collector Koya Sree Harsha, ki kynhun na ka tnad Revenue, Police, bad Labour ki la pynlong ïa ka jingleit jngoh ïa ki jaka bad ki la ïoh ban pyllait im ïa ki nongbylla na ka jaka trei jong ki. Hadien la phah biang ïa ki sha la ki shnong trai.La ïathuh ba ki trai jong ki jaka shna maw-it ki la pynpaw ba la dep ban siew lypa sha ki nongtrei bad ba la pynbeit ïa ki bai lutksan katkum ka jingïateh.
U Ophisar ka District Labour MK Hemalatha u la ong ba baroh ki jingmyntoi kiba dei ban ïoh bad ka jingsiew kaba dang sahteng la siew sha ki 16 ngut na ki nongtrei, katba ki nongtrei kiba dang sah ki la dep ban ïoh ïa ka jingsiew jong ki kham mynshwa.
Ka la pynshai ba ki nongtrei ki la pynpaw ba kim kwah ban bteng ïa ka kam ha ka jaka shna maw-it bad la phah biang ïa ki katkum ka jingkwah jong ki, ryngkat bad ki tiket rel ba la pynbeit da ka bor synshar.
Ha ka jingtohkit, ki bor pynïaid ki la ïathuh ba ym shym la lap ïa ki jingshah teh shah khum ne kino kino ki dak na katei ka jaka ban pyni ba kine ki nongtrei ki la shah rahbor.
