Washington, Rymphang:
U nongmih khmat jong ka United States sha ka NATO, ha ka Sngi Thohdieng u la ong ba ka Russia kan nym long ba la kloi ban mynjur ia ki jingiateh ban sangeh thma noh ha Ukraine.
“Ki nong Ukraine, nga pyrkhat, ki kloi ban thaw ïa ka jingïateh kular mynta hi kaba long kaba shongnia, ba hapoh ki jinglong jingman kan long kaba hok,” ong u nongmihkhmat u Matthew Whitaker ha ka kynhun ha ka jingïalang jong ka jingïada ha Munich.
“Hynrei nga shu sngewskhem ba ha kaba kut ki nong Russia ki long kiba la pynkhreh ban ïateh kular bad ba kin sa lah ban wanrah ia ka jingïateh kular kaba pura,” u la bynrap.
Namar na ka liang jong u President ka US, u Donald Trump, u dang ïai pynbor ia ka Russia ba kan pynkut noh ïa ka jingïakynad, kaba la sdang ha ka por ba ka Russia ka la leit hiar thma ïa ka Ukraine ha u Rymphang jong u snem 2022, hynrei ka jingïakren ba la lam khmat da ka US kam shym la wanrah jingmyntoi eiei ban ïapynbeit wat haduh kane ka kynti ba mynta.
Ka Russia ka la bat skhem ïa ki jingdawa jongka ban shim noh ïa ki jaka bad ki jingailad saiñ hima sima na ka Ukraine, kaba la pyrshah bad kyntait jur da ka Ukraine bad ka dang pynbor ïa ki shipai Ukraine ban mih noh na ka thaiñ Donetsk kaba don sha ka phang Mihngi jong ka Ukraine.
