Bengaluru, Rymphang:
U Myntri barim bad u MLA jong ka seng BJP u Byrathi Basavaraj, u la shah hukum ba un shong patok da kumba 7 sngi na ka bynta ka jingshah tohkit ha kaba ïadei bad ka jingshah pynïap jong uwei u briew ïa uba la tip kyrteng kum u Shivaprakash ba la tip ruh da ka kyrteng kum u Biklu Shiva, uba la kylla long u nongïarap ha ka ban tyrwa ïa ki ïing bad ki jaka, hadien ba ki doktor jong ka Jayadeva Institute of Cardiovascular Sciences and Research, ki la pynshisha ba um dei uba don ka jingshah ktah ha ka liang ka jingpang jingshitom.
Ka kynhun Criminal Investigation Department (CID) ka la kem ïa u MLA u KR Puram ha Kempegowda International Airport ha ka janmiet jong ka sngi Palei hadien ba u la hiar na Ahmedabad, katto katne kynta hadien ba ka Supreme Court ka la kyntait ïa ka jingpan jamin bahashwa jong u.
Ha ka sngi Thohdieng, ki heh jong ka kynhun CID ki la ïalam ïa u Basavaraj ha khmat ka Special Court na ka bynta ki mukotduma pyrshah ïa ki MP/MLA kiba mynta bad kiba rim.
Hadien ba u nongïasaid aiñ jong u Basavaraj u la pynpaw ïa ka jingsngewkhia halor ki jingeh kiba ïadei bad u klong snam jong u, ka kashari ka la phah ïa u ban leit phah khmih bniah ha Jayadeva Hospital.
Ki doktor ha ka sngi U Blei ki la pynbna ba u long uba koit bakhiah. Hadien kata la ïalam ïa u Basavaraj hakhmat u nongbishar u Shivakumar ha ka ïing sah jong une u nongbishar ha ka sngi U Blei.
Ki pulit ki la pan por khyndai sngi ban set phatok ïa u Basavaraj, hynrei u nongïasaid aiñ jong u u la pyrshah.
Nangta ka ïingbishar ka la ailad da 7 sngi ban set patok ïa u na ka bynta ban pynlong ïa ka jingtohkit.
U nongïasaid aiñ jong u Basavaraj u la pan jingbit ban pynbiang ïa u ïa ki jingbam ba la shet ha ïing, hynrei ka ïingbishar ka la bthah ïa ka liang pyrshah ban ujor ïa ka aplikeshon kaba pura.
U nongbishar u la bthah ba dei ban ai jingbam ïa u katkum ka Diet Chart ba la bthah da ka Jayadeva Hospital.
