Shillong, Rymphang 17
U Symbud Myntri Rangbah ba khmih ïa ka tnad Kam Pohïing Bah Prestone Tynsong u la pyntip ha ïingdorbar thawaiñ ba haduh 658 ngut ki nong Bangladesh kila shah bat bad shah pynngat ha ki kyndon aiñ hapoh Jylla naduh u snem 2021 bad 194 ngut la pynphai pat hadien ba ki pyndep ïa ka por pynsajia.
Haba jubab ïa ka call-attention notice bala wanrah da u MLA ka VPP na Mawryngkneng Bah Heaving Stone Kharpran ha ka sngi Ba-ar, u Bah Prestone u la pyntip ba ka Sorkar kala thaw ïa ki lad ïakhun mynder ri kaba bniah bad ba bun bynta khnang ban tehlakam ïa ka jingwan rung beaiñ.
U la pyntip ba ki 18 tylli ki anti-infiltration check post, ki khyrdop bad ki land custom station mynta kila treikam ha ki jaka ba kongsan ha kylleng ki jaka khappud, kata khappud bad ka Assam bad kumjuh ruh khappud bad ka Bangladesh.
“Ïa kine la kyrshan pat da ki Anti-Infiltration Special Squads kiba treikam ha baroh ki district, kiba ju pynlong ïa ka jingkhynra mynder ri, talasi kali ba kynsan ha ki surok (NAKA) bad jingïaid pahara ha ki jaka ba suba don ki mynder ri, ha ryngkat ka jingïatreilang bad ka tnad Labour, Village Defence Party bad ki bor shnong,” ong u Bah Prestone ha ïingdorbar.
Ka Sorkar kala thaw ruh ïa 11 tylli ki District Task Force ban bat bad pynphai ïa ki mynder ri kiba wan rung beaiñ.
“Kine ki lynti kila lam sha ka jingïoh bat ïa bun ngut bad ka jingtreikam kaba sei ïa u soh,” u la ong haba pyntip “Naduh u 2021 haduh ka 03/02/2026, haduh 658 ngut ki nong Bangladesh la ïoh ban bat ha Jylla bad la pynngat ïa ki hapoh ki kyndon aiñ ba ïahap. Ha kane ka juh ka por, haduh 194 ngut ki nong Bangladesh la pynphai pat hadien ba kila pyndep ïa ka jingpynsaja bad hadien ba kila ïoh ïa ka Travel Permit na ka Bangladesh Embassy”.
U Bah Prestone u la bynrap ba ka Sorkar kala thung ïa ka State-Level Committee ka ban peitngor ïa ka jingpynithuh bad jingpynphai ïa ki mynder ri kiba sah tam ïa ka por ba ki dei ban sah.
Ka Meghalaya Resident Safety and Security Act, 2016, mynta kala treikam ha kiba bun ki jaka jong ka East Khasi Hills, haba pyntreikam ruh ïa ki kyndon jong ka Immigration and Foreigners Act, 2025, ka Bharatiya Nyaya Sanhita bad ki kyndon ka Ministry of Home Affairs.
“Ka Sorkar ka kyrpad ïa baroh ki kynhun seng bad ki nongshong shnong ba kin ïatreilang bad ki bor Sorkar bad ban shah ïa ka jingpynshisha ban sa leh lyngba ki lynti ka aiñ,” u la ong haba ban jur ïa ka jingdonkam ban ïada ïa ki nong India ba pura bad pynthikna ba ki mynder ri ba buhai shnong beaiñ kin ngat ha ka jingpynsajia ba tyngeh katkum ka aiñ.
