Dhaka, Rymphang:
U nongïalam ba shipor jong ka Bangladesh, u Muhammad Yunus, u la hiar shuki ha ka Sngi Nyngkong, ha ka jingpynbna ïa ka jingïakhun ïa ka jaitbynriew, ha shwa ba un aiti noh sha ka sorkar ba thymmai.
“Mynta ka sngi, ka sorkar ba shipor, kan sangeh treikam noh”, la ong une u nongjop Nobel Peace Prize, uba la 85 snem ka rta.
“Hynrei to ai ba ka jingleh ia ka synshar paidbah, ka jinglaitluid ban kren, bad ki hok ba kongsan kiba la sdang kan nym sangeh.”
U Muhammad Yunus u la wanphai na ka jingsangeh treikam jong u ha u Nailar 2024, katto katne sngi hadien ba ka sorkar ba don ki kti nar jong ka Sheikh Hasina ka la shah pynkhyllem da ka jingiakhih ba la ialam da ki samla pule bad ka la phet krad da ka liengsuin sha India.
“Kata ka dei ka sngi jong ka jingpyllaitluid kaba khraw,” u la ong. “Kaei ka sngi kaba kmen! Ki nong Bangladesh ha kylleng ka pyrthei ki la jaw ummat jong ka jingkmen. Ki samla jong ka ri jong ngi ki la pyllait ia ka na ka jingshah teh ha u ksuid.”
U la ïalam ïa ka Bangladesh kum u “nongïarap ba ha khlieh duh” jong ka naduh katei ka por, bad mynta u la aiti noh ïa ka bor synshar hadien ba u la ai khublei ïa ka Bangladesh Nationalist Party (BNP) bad ïa u nongïalam jong ka, u Tarique Rahman halor ka “jingjop kaba khraw” ha ka elekshon ha ka taiew ba la dep.
“Ki paidbah, ki nongthep vote, ki seng saiñpyrthei, bad ki jaka ba don bynta kiba ïadei bad ka elekshon ki la buh ïa ka nuksa kaba dei ban ïaroh,” ong u Yunus.
“Kane ka elekshon ka la buh ia ka nongrim na ka bynta ki elekshon ban wan.”
U Rahman, uba don 60 snem ka rta, uba dei u heh jong ka seng BNP bad uba dei u khun jong kawei na ki hima saiñ hima sima ba donbor tam jong ka ri, un ïalam ïa ka jaitbynriew jong ka South Asia, kaba don 170 million ngut.
