Bhubaneswar, Rymphang:
Ki pulit jong ka Odisha, ki la ïoh ban pyllait im ïa uwei u khyllung ba dang 2 snem shiteng uba la shah die ha u kpa jong u sha uwei pat u briew da T. 1. lak, ong ki heh pulit. Baroh arngut u nongdie bad u nongthied ki la shah kem noh ha ki pulit.
Kane ka jingjia kaba la jia ha ka shnong Barisahi kaba don ha ka thaiñ Nilgiri Notified Area Council ka la paw pyrthei hadien ba ka durkhih kaba la kam ba ka pyni ïa u kpa ba u ïateh kular bad uwei u nongthied uba thmu ban thied ka la saphriang bha ha ki Social Media. Hadien kata uwei u nongïaleh ban pynïoh ïa ka hok ki paidbah u la buh da ka jingujor ha Nilgiri Police Station.
“Ïa une u khyllung la ïoh ban pyllait im na ka thaiñ Chiminibhati bad la aiti sha ka komiti ba dei peit ïa ki khynnah. Ka jingtohkit kaba kham bniah ka dang ïaid shakhmat,” ong u heh pulit ka Nilgiri Sub-divisional u Pramod Kumar Mallick bad bynrap ba ki pulit ki la kem ïa arngut ki briew ha kaba ïadei bad kane ka kam.
Ki pulit ki la pynithuh ïa une u kpa jong une u khyllung kum u Rakesh Kumar Behera ba la tip ruh da ka kyrteng sin kum u Kua uba dei u nongshna bad nongohshrong ohshrup ha ki maw bad la kynnoh ba u la ïoh ïa ka pisa kaba T.50 hajar kum ka bhah kaba nyngkong.
U Behera u la kam ba ka jingeh ha ka liang ka pisa tyngka ka la pynlong ïa u ban leh ïa kane ka kam. “Ngi don saw ngut ki khun bad ngi mad jingeh ban pynheh pynsan ïa ki, uwei u briew uba la tip u la pynbeit ïa u nongthied bad nga la aiti ïa u khunlung”, u la ong haba kren sha ki nongthoh khubor. Ka khubor na ki pulit ka ïathuh ba u Behera u la shongkurim arsien bad une u khyllung uba la shah die u dei na ka lok kaba ar, kaba la ïashong khlad bad u.
