Shillong, Rymphang 17
U Myntri ka tnad khajna, Bah Lahkmen Rymbui u la kubur ïa ka jingeh halor ka synshar-khadar ha ka liang ka khyndew ka shyiap (ha ka Jylla) da kaba kdew ïa ka jingdon bynta jong ki kynhun bapher-bapher ba kynthup ïa ki kur ki jait, ki Raid, ki Hima, ki Elaka, ki District Council, bad ki dkhot ‘riew shimet.
Haba jubab ïa ka ‘Special Motion’ hapoh Ïingdorbar ha ka Sngi Ba-ar, u Bah Lahkmen u la ong, “Ka khyndew ka shyiap ka dei ka kam kaba eh bad ka kam ban synshar ïa ka khyndew ka shyiap ha ka Jylla ruh ka long kaba jwat bha…ka kur ka jait, ka Raid, ka Hima, ka Elaka, ka District Council bad ki dkhot ‘riew shimet ki don ka bynta kaba pher ha ka ban synshar ïa ka khyndew ka shyiap.”
U la ban jur ba ka jingshim jaka ka shong ha ka synshar aiñ, khlem kano-kano ka jingkyntur ba pynbor ne ka jingduhnoh ïa ka jinglong trai (alienation).
“Haduh kine ki sngi, kam don kano-kano ka jingkyntur kaba pynbor, ka jingduhnoh ïa ka jinglong trai, baroh ka jingshim jaka ka hap ha ka jingsynshar jong ka aiñ,” la ong u Bah Lahkmen.
U Myntri u la batai ba ki District Council bapher-bapher ki don ki rukom pynïaid khyndew bapher-bapher, bad ka kamram jong ka Sorkar ka long ban pynbeit ryntih ïa ka rukom bat khyndew.
U la kdew ïa ka Meghalaya Land Survey and Record Preparation Act 1980, kaba pynbiang ïa ka jingjurip bad jingpynkhreh ïa ki kot ki sla, bad ka kynthup ïa ki District Council ha ka jingpyntreikam ïa ka.
U Bah Lahkmen u la pyntikna ba ka jingshim jaka ka bud ïa ka rukom kaba dei, kata yn ym lah ban shim jaka khlem da don ka NOC na u Rangbah Shnong ne u Doloi, bad ka jingai ‘Patta’ da ka GHADC.
“Kaei kaba ngi leh, ka long katkum ki kyndon jong ka aiñ,” u la ong.
