Shillong, Rymphang 17
U Myntri Rangbah ka Jylla Conrad K Sangma u la ïathuh ba ka Sorkar Jylla kan hap ban pynlut tam sa arspah klur tyngka haba pyntreikam ïa ka rukom siew tulop kaba la buh ryntih ïa ki nonghikai SSA bad Adhoc naduh ka 1 tarik Ïaïong, 2026.
Haba jubab ïa ka jingkylli ba la wanrah ha ïingdorbar ha ka sngi Ba-ar, u Conrad u la ïathuh, “Ka Sorkar ka la ju pynlut haduh T.600 klur na ka bynta ki nonghikai SSA bad Adhoc ha ki skul Lower Primary bad Upper Primary bad da kane ka rai jong ka jingsiew kaba la buh ryntih ban treikam, ngi la ai ka jingkiew tulop kaba 3 percent.”
Kumta ka Sorkar kan pynlut T.800 klur haba buh ïa ka jingsiew kaba la buh ryntih ïa ki nonghikai.
U la ong biang ba palat 23,007 ngut ki nonghikai la khmih lynti ba kin ïoh jingmyntoi hynrei kane ka rai kaba la shim ka dei kaba eh na ka bynta ban pynbeit ïa ki jingeh jong ki nonghikai.
U Conrad u la batai ba ka rukom hikai skul ha Meghalaya ka long kaba jynjar tam namar ha ki skul Sorkar, SSA bad Adhoc la pynïaid kham bunsien da ki Management Committee ki riew shimet.
Shuh shuh u la ong ba 90 percent ki skul Adhoc bad Deficit ki dei ki skul shimet, ym jong ka Sorkar, hynrei ka Sorkar ka la shu ai jingïarap namar ba kim lah ban pynïaid.
Ha ka jingïaid ka por, kine ki grant kila wandur kum ka tulop, kaba lam sha ka jingkhmih lynti ba ka Jylla kan siew lut ïa baroh.”Ka jingkitkhlieh ïa ka Sorkar ka dei beit ïa ki skul Sorkar, hynrei ïa ki skul Adhoc la pynïaid da ki riew shimet, hynrei ngi sngewthuh ïa ka jingeh jong ki nonghikai,” U la ong.
U la ban jur ba ka rukom treikam kaba thymmai kan treikam tang ïa ki nonghikai SSA bad Adhoc kiba la “sahkut kumjuh ka tulop” bad ba la pynbeit hapoh ka FASTOM.
“Ngim don hangne ban shimti ïa ki skul”, la ong u Conrad haba jubab ïa ki jingeh ba la pynpaw da u nongïalam ka liang pyrshah u Mukul Sangma, hynrei “Ngi wanrah ïa ka jingsiew kaba la buh ryntih katkum ka jingdawa jong ki nonghikai.”
U la pyntip biang ba ïa ki skul deficit yn sa bishar kyrpang.
“Ki skul Deficit ki dei ka sienjam kaba bud, ngi dang eksamin, ngi kwah ban ïarap ïa baroh, hynrei man la ka rai ka don ka jingktah ha ka liang ka pisa tyngka hynrei kumba ka long mynta ngi dang pynbeit ïa ka jingeh tang ïa ki Adhoc bad ka SSA,” u la ong.
U Conrad u la ïathuh ba ka Jylla Meghalaya, kaba don palat 55,000 ngut ki nonghikai bad 14,000 tylli ki skul, ka ïakynduh ïa ka jingeh kaba kyrpang haba ïanujor bad kiwei pat ki Jylla ka thaiñ Shatei Lam-Mihngi.
