Shillong, Rymphang 17
U Lamphang ka ïingdorbar thawaiñ ka Jylla u Thomas A Sangma ha ka sngi Ba-ar, u la rai ban nym shah ban ïatai ïa ka jingjia bthei par dewïong ha Mynsngat-Thangsko, da kaba pynpaw ba kane ka rai jong u ka dei kaba khatduh bad kaba long katkum ka rule.
“La pyntip sha nga ba kane ka kam ka long sub-judice bad ka dang don ha ka jingbishar ka ïingbishar bad kumta, nga la shim ïa ka rai katkum ka Rule 57, sub-clause 6. Nga ïeng skhem ha kane ka rai bad ka rai u Lamphang ka dei kaba khatduh,” ong u Thomas haba bynrap ba u Myntri Rangbah ka Jylla u la dep ban ai ïa ka suo-motu statement halor kane ka jingjia.
Haba kdew ïa ka rule, u MLA ka VPP na Nongkrem ula ïasaid ba ka ktien ‘sub-judice’ la ju pyndonkam beit da ka liang synshar ban kiar ïa ka jingïatai.
“Kum ka ïingdorbar, ngi don ïa ka hok ban ïatai ïa ki kam ba sngewkhia. Wat ki ïingbishar dalade ki la pynksan ba ym don jingteh ïa ki jingïatai jong ki ïingdorbar thawaiñ (tang namar ba ka kam ka dang don ha ka jingbishar jong ki),” u la ong.
U la kyntu ba dei ban shah ïa ki dkhot ka ïing ba kin ïakren halor ka jingjia bthei ka par dewïong ha Mynsngat-Thangsko.
“Ki paidbah ka Jylla ki kwah ban tip kaei ka daw kaba lam sha kane ka jingjia ba sngewsih bad ki kam ba ïadei bad ka jingtih dewïong beaiñ ha ka Jylla,” u la ong.
U Nongïalam ka Liang Pyrshah u Mukul Sangma u la kyrshan ïa kane ka jingdawa.
U la ong ba ka Sorkar kala dei ban kyrpad ïa ka ïingbishar ba kan shim bishar kyrpang ïa kane ka jingjia, ym ban pyndait lang bad kiwei ki PIL.
Hynrei u Lamphang, u la kyntait ban khyllie biang ïa kane ka mat bad ong, “Ngin ym ïakren shuh ïa ka, namar nga la dep ban shim rai,” haba pynkut syndon ïa kane ka jingïakren.
