Shillong, Rymphang 17
U Myntri Rangbah ka Jylla, u Conrad K. Sangma u la pynshai ba ki kyrtong na ka thup kyrdan ‘Unreserved’ (UR) ki lah ban ïakhun na ka bynta 15% ki jinglait kam (bym shym la bhah ne unreserved vacancy) katkum ka Reservation Policy jong u snem 1972.
Haba jubab ïa ka jingkylli ba la wanrah hapoh Ïingdorbar ha ka Sngi Ba-ar, u Conrad u la ong, “Ki kyrtong jong ka thup kyrdan UR ki lah ban ïakhun ha ki kam ba thylli kiba 15% ki bym shym la bhah katkum ka Reservation Policy jong u snem 1972 katkum ka rai ba la mynjur ha ka 12 tarik u Kyllalyngkot, 1972 bad ka ‘Reservation Roster’.”
Ha kaba ïadei bad ka jingnang ban kren ïa ka ktien jong ka thaiñ, u Conrad u la kdew ïa ka ‘Government Office Memorandum’ jong ka 24 tarik u Naitung, 2023, kaba kdew ba ki kyrtong kiba aplai ïa ki kam hapoh ka District Selection Committee ki dei ban pyndep ïa ka ‘Qualifying Paper’ halor ka jingnang ïa ka ktien jong ka thaiñ jong kata ka distrik.
Shuh shuh u Myntri Rangbah u la pyntip ba ka jinglum jingtip halor ki kam hapoh ka thup kyrdan UR ba la pynbna bad pyndap ha kylleng ka Jylla ha ki snem 2023-24, 2024-25, bad 2025-2026 ka dang ïaid, da kaba bynrap ba ki kam jong ka Sorkar Pdeng kim hap hapoh ka jingpeit jong ka Sorkar Jylla.
