Shillong, Rymphang 17
U Myntri ba dei khmih ïa ka Koit ka Khiah ka Sorkar Jylla, u Bah Wailadmiki Shylla u la kubur ïa ka jingduna jong ki doktor bad ki nos ha ki katto katne ki jaka sumar (hospital) Sorkar, haba kdew ïa ka daw na ka jingnang bun ki nongpang ha kine ki lai snem ba la leit.
Haba jubab ïa ka jingkylli ha Ïingdorbar Thawaiñ ha ka sngi Ba-ar, u Myntri u la ong “Ka don ka jingduna ki doktor bad ki nos ha ki katto-katne ki jaka sumar Sorkar bad ha kajuh ka por ka la don ka jingkiew kaba jur bha ha ka jingwan sumar ki nongpang ha ki jaka sumar Sorkar ha kine ki lai snem ba la leit noh bad mynta u snem”.
Ka Directorate of Health Service (MP) ka la pyntreikam ïa ki kor peit bniah lyngba ka ‘dashboard’ ban leh ei-ei halor kane ka kam.
