Shillong, Rymphang 17
U President ka Voice of the People Party (VPP) kaba don ha ka Liang Pyrshah uba dei ruh u MLA ka Nongkrem u Bah Ardent Miller Basaiawmoit u la kynnoh ïa ka jingdonkti jong ka Sorkar Meghalaya bad ki nongtih dewïong beaiñ, da kaba ong ba ka jingjia ba dang shen jong ka jingbthei ka par dewïong ka la pynpaw ïa ka jingshisha.
“Ka por ba ka Sorkar kan kyntait ka la kut. Mynta baroh, baroh kawei ka Ri ka la tip ba ka jingtih dewïong beaiñ ha Meghalaya ka dang bteng”, la ong u Bah Ardent haba kdew ïa ka jingbthei jong ka par dewïong ha Mynsngat-Thangsko.
U la buh jingkylli ba kumno ki Myntri ki lah ban kam ba kim tip ïa ka jingtih dewïong beaiñ, da kaba ong, “Haduh katno phi lah ban leh kumta?, ka Sorkar ka lah ban kyntait ïa kata hynrei ki paidbah ki tip, ki lum ki tip, ki wah ki tip namar ba ki la shah ktah ha kane ka jingtih dewïong beaiñ ha kine ki 12 snem ba la dep.”
U Bah Ardent u la dawa ban pynshitom pyrshah ïa ki heh Sorkar jong ka district na kaba u dewïong u ïaid lyngba, da kaba ong ba ka jingpynkynriah kam ka long kaba “jem palat” haba ka la don ka jingduh jong ki mynsiem ba lui lui. “Lada ka Sorkar ka sngew ba em ngim don bynta eiei bad kane ka kam dewïong te balei kim shimkhia beit beit pyrshah ïa ki khlieh jong kine ki district baroh ba u dewïong u hap ban ïaid – pyrshah ïa ki DC bad ki SP jong kine ki saw-san tylli ki district,” u la ong.
U la kynthoh ïa ka rai jong u Lamphang ban nym ailad ïa ka jingïatai halor katei ka jingjia, da kaba ong ba ka Sorkar ka kyntait ïa ka jingshisha. “Kane kam dei ka jingjia kaba nyngkong hynrei man ka por ba ngi rah ïa ka mat ka Sorkar ka kyntait”, la ong u Bah Ardent.
Ka jingkyrkieh jong ka Sorkar ban pynsangeh noh ïa ka kam pyllait im:
Shuh shuh, u Bah Ardent u la kynthoh ïa ka Sorkar kaba la pynsangeh noh kloi palat ïa ka jingwad ban pyllait im hadien ka jingbthei ka par dewïong ha Mynsngat-Thangsko.
“Nga tharai ba ka long kaba sngewsih haduh katta katta ba la pynsangeh stet ïa ka jingpyllait im, lymda ka Sorkar ka tip katno ngut ki nongtih dewïong ki don hapoh ka krem dewïong, kim dei ban shu rai pynsangeh noh ïa ka kam pyllait im”, la ong u Bah Ardent.
U la buh jingkylli ïa ki jingkheiñ jong ka Sorkar halor ka jingdon ki nongtih dewïong kiba sahkut shapoh, da kaba ong ba ki nongshong shnong ki “thikna shispah na ka shispah” ba ki jingkheiñ ki long kiba rit palat.
“Ka mat kaba ngi rah ka long kaba donkam bha ïa ki paidbah. Ka jingduh ki mynsiem briew bad ka jingbteng. Kam dei ba la sei lut ïa ki met ïap baroh,” u la bynrap.
U Bah Ardent u la ong ba ki jingtip na ka thaiñ ki kdew ba kumba 60-70 ngut ki nongtih dewïong ki ju trei ha kawei ka par dewïong, bad u la dawa na ka Sorkar ba kan pynphla ïa ka jingkheiñ na ki briew ba la shah kem.
“Ngi kwah ban tip thikna katno ngut ki nongtih dewïong ki don hangta namar kito ki met ïap ba la ïoh sei ba ka Sorkar ka la pyni, kam shym la long tang kumto kiba ka Sorkar ka la ai”, u la ong.
Halor ka rai jong ka Sorkar ban thaw ïa ka Judicial Inquiry Commission, u Bah Ardent u la pynpaw ïa ka jingsngew artatien.
“Da kaba ïaid katkum ki rekod jong ki jingmih na kine ki commission… ngi sngew ba ngim lah ban khmih lynti shibun na kane ka commission,” u la ong haba kdew ïa ka jingshah pynïap u nongïalam ka HNLC u Bah Cheristerfield Thangkhiew.
