Hyderabad, Rymphang:
U President jong ka All India Majlis-e-Ittehadul Muslimeen (AIMIM) u Asaduddin Owaisi u la kynnoh ba ka sorkar pdeng ba la ïalam da ka seng BJP ka pyrshang ban “klop ïa ka hok long nongshong shnong” lyngba ka SIR jong ki thup kyrteng jong ki nongthep vote.
U MP ka Hyderabad u la kam ba hadien ka Bihar yn sa leh ïa ka Special Intensive Revision ha Telangana bad ha Maharashtra.
“Nga kyrpad ïa ki paidbah ban pynthikna ba haba pynlong ïa ka SIR, baroh ki kyrteng kiba shisha kin kynthup lang. Ka BJP ka kwah ban knieh ïa ka jinglong nongshong shnong lyngba ka SIR. Ka pyrshang ban leh ïa kane da kaba pynlong ïa ka jingpynthymmai lyngba ka Election Commission of India [ECI]”, u la kynnoh.
Ki bor pynïaid bad kiba dei khmih ha ka ilekshon ha Telangana ki la ïathuh ba ïa ka SIR jong ki kyrteng nongthep vote ha kane ka jylla la lah ban pynbna hapoh u bnai Ïaïong-Jymmang jong une u snem.
U Owaisi u la pynrem ruh halor ka jingshah leh donbor jong u nongdie jingdei rud lynti uba dei u Muslim uba la shah pyndik ha ki katto katne ki YouTuber ha ka por ba dang shu pynlong ïa ka tamasa Medaram Jatara ha Telangana.
Ha kaba ïadei bad kane, u la dawa ba ki pulit ka Telangana ki dei ban ujor mukotduma pyrshah ïa kito kiba pynshitom beiñ ïa u nongdie jingdie, da kaba pynpaw ba kum kine ki kam pyntieng pynsmiej bad pynïasoh ïa ki jaitbynriew kim lah ban pdiang bad dei ban leh da kaba tyngeh katkum ka aiñ.
U Owaisi, u la dawa ba dei ban pynshitom da kaba tyneh katkum ka aiñ pyrshah ïa ki YouTubers.
