Srinagar, Rymphang:
Kumba la ïathuh ka tyllong khubor, la ong ba lai ngut kiba shah kem, kiba kynthup ïa arngut ki nong Pakistan, ki la lait phet na kawei ka jaka set ïa kiba donkti ha ki kam beaiñ kiba dang poh rta ne na ka Juvenile Home ha Jammu ha ka lah sngi U Blei hadien ba ki la siat ïa ki pulit kiba pahara ha katei ka jaka, ha kaba ki la don arngut ki pulit kiba la mynsaw.
Ki pulit ki la pynlong ïa ka jingwad bniah kaba jur ban lap ïa kine ki lai ngut bad ki la sdang ruh ïa ka jingtohkit ban pynthikna kumno ki koidi ki la ïoh ïa ki tiar siat.
Katkum ka khubor na ki pulit la ong ba ki koidi ki la siat ïa kitei ki arngut ki pulit hapoh ka Juvenile Observation Home kaba don ha ka thaiñ RS Pura jong ka Jammu ha ka por kumba 5.05 baje janmiet. Ha katei ka jingsiat, arngut ki pulit ki la mynsaw katba ki lai ngut ki koidi ki la lait phet.
Na kine ki lai ngut kiba la shah kem, arngut ki dei ki nong Pakistan, kiba la tip kyrteng kum u Ahsan Anwar bad u Mohammad Sanaullah.
U koidi uba lai uba la lait phet u dei uba la tip kyrteng kum u Karanjit Singh ba la tip ruh da ka kyrteng kum u Gugga uba shong ba sah ha R S Pura, Jammu.
Ki pulit kiba la shah pynmynsaw, ki dei kiba la tip kyrteng kum u Vinay Kumar bad u Praveen Kumar, la phah noh sha ki jaka sumar ba marjan, ha kaba na katei ka jaka, la pynkynriah noh ïa ki sha Government Medical College (GMC) Jammu, na ka bynta ban ïoh ïa ka jingsumar kaba kyrpang.
Hadien katei ka jingjia, ki pulit bad ki kynhun shipai bad ki heh pulit ki la leit sha ka Juvenile Home na ka bynta ban leit jurip bniah ïa ki jinglong jingman.
Ki pulit bad ki shipai ki la pynlong ïa ka jingwad bniah kaba jur ban lap ïa kitei ki lai ngut.
Ki bor pahara ki la buh ïa ki jaka talasi shipor ha katei ka jaka bad ki jaka ba marjan jong ka, ha kaba la talasi bniah ïa baroh ki kali bad ki nongleit nongwan bad la peit bniah ïa ki I-card jong ki.
Ki pulit ki la sdang ruh ïa ka jingtohkit ban pynthikna kumno kine kiba shah set ki ïoh ïa ki tiar siat ha katei ka jaka sah jong ki khynnah.
“Yn sa tohkit kumno ki tiar ki la poi sha katei ka jaka sah jong ki khynnah, yn sa tohkit mano ba wanrah ïa ki suloi hangtei bad katkum ka jingbthah jongno”, la ong ki tyllong khubor.
