Sweden, Rymphang:
Uwei u briew uba don ha ka thaiñ Shatei Lam Mihngi jong ka Sweden, u la shah suba ba u la iarap ia palat 100ngut ki shynrang ban thied jingthiah bad ka tnga jongu, ong u nongmudui ha ka AFP ha ka sngi Nyngkong.
Ka ain jong ka Sweden halor ka kam khaii met ka khang ia ka jingthied ia ka jingshongkha hynrei ym ia ka jingdie.
Utei u briew, uba la don ha ka rta kaba 60 snem shaneng, u la shah kem ha kaba kut jong u bnai Lber, hadien ba ka tnga jongu, ka la ujor sha ki pulit bad la set phatok ia u, naduh katei ka por, ong ka prosecutor Ida Annerstedt, ha ki nongthoh khubor.
U Annerstedt u la ong ba ia utei u briew la set phatok namar ba la suba ba u la leh ia ka kam “jingthied”.
Ka la ong ba ki pulit ki dang wad bniah ia kiwei pat ki kam runar kiba la suba hynrei ki la kyntait ban ai jingtip bniah, da kaba kdew ia ka jinglong rieh jong ka jingtohkit kaba dang iaid shakhmat.
Ka la kyntait ruh ban iathuh la katei ka kynthei kaba la don ha ka rta kaba 50 snem ka rta, ka la shah pynbor ban die ia ka jingshongkha ne em.
Kitei ki kam runar kiba la suba ba ki la jia naduh u Kyllalyngkot 2022 haduh ban da kem ia utei u rangbah ha u snem ba la dep.
Ka Annerstedt ka la ong ba ka khmih lynti ban pynngat mukotduma ha ka 13 tarik u Lber.
U nongmudui u la ong ba la ithuh ia 120 ngut ki briew shimet kiba la suba ba ki la thied ia ki jingshakri ha ka kam shongkha shongman hynrei kam long kaba lah ban lah ban tohkit ia ki baroh kum shi bynta jong ka jingtohkit ba kongsan.
Lah ban sdang ia ki jingtohkit ba kyrpang ia ki nongthied hadien ba la kut ka mukotduma.
Ka tnat pathai khubor paidbah ka SVT ka la iathuh ba utei u briew uba la kyntait ia katei ka kam runar, u la shah rai pynrem mynshwa ha ki katto katne ki kam runar, kynthup ia ka jingshah thombor bad ka jingpynbor be-aiñ.
