Mairang, Rymphang 17
Ha ka sngi Ba-ar ka Dorbar Shnong Nongthymmai kaba hap hapoh Eastern West Khasi Hills District ka la pynlong ïa ka rally ban pynrem jur ïa ki nongpynïap briew kata ha kaba ïadei bad ka jingshah pynïap u samla Kerang Sawkmie, 25 snem ka rta na ka shnong Nongthymmai hadien ba u la jah na la ïing naduh ka 6 tarik bad khlem wanphai shuh.
Lah ban kdew ba halor kane ka jingjia ki bahaïing ki la ujor sha ki bor pulit bad ha ka jingtohkit ki pulit, ki la kem ïa ki 3 ngut kiba suba donkti ban pynïap ïa utei u samla.
Shuh shuh ha kane ka sngi, la sdang ïa ka rally naduh madan Nongsiej jong ka shnong Nongthymmai bad la ïaid ter-ter sha Mawpdah, Madan Maroid bad pynkut ha madan Nongsiej ha kaba da ki spah ngut ki paidbah kiba kynthup naduh ki longkmie, ki longkpa, ki khynnah skul ki la wan ban ïashim bynta ha ryngkat ki lama ïong bad ki banner kiba pynpaw ïa ka jingdawa ban pynshitom ïa ki runar bad ban set patok shi jingim ïa ki riew thrang snam.
Hadien ba la dep ka jingïaid rally, la ïoh ban pynlong ïa ka jingïalang ba lyngkot ha madan Nongsiej ha kaba la sakhi ïa ka jingïadonlang naduh ki nongïalam jong ka Synjuk 12 Shnong Area Maroid, ki nongïalam ka VDP Nongthymmai, ki seng longkmie, ki nongïalam ka KSU Nongkhlaw, u Sordar Shnong Nongthymmai ha ryngkat ki samla, ki riew rangbah, ki longkmie bad ki khynnah skul.
Ha kane ka jingïalang la ïoh ïa ka jingkren na ki nongkren bapher-bapher kiba kynthup naduh u President ka VDP Bah D Warjri uba la ïathuh ba ha shwa ban jia kane ka jingjia kine ki briew ki dei kiba ju ïaleh pyrshah ïa ka shnong bad ïa ka VDP ha kaba ka la phah ruh sha ka aiñ namar ba ki la leh pyrshah ïa ka shnong haba ki pynkulmar ïa ka imlang ka sahlang, hynrei kaba lyngngoh ka long ba ki ïoh jubab na ka aiñ ba utei uwei na ki, um don ka bor pyrkhat kaba biang.
U la ong ruh ba na ka liang jong ki, ki la ju pyntip ba ki ju pynthut ïa ka ïaid ka ïeng ki nongshong shnong hynrei ka aiñ kam pdiang bad dei tad kane ka jingjia ba ki la shim ïa ka jingim ba ki sa kyndit thret. U la kyntu ba haba ki ujor ïa kino-kino ki nongleh kam sniew, ka aiñ ka dei ban shimkhia.
Nangta, na ka liang ki bahaïing pat ha kane ka jingïalang kila pynpaw ïa ka jingsngewsih ba ïa utei u para uba la duh noh ïa la ka jingim, kim shym la ïoh ban leh niam haduh kane ka por ba mynta.
Ki la ong ruh ba kum ka ïing ka sem, ka kur ba ïa kine ki kñi kin ym pdiang shuh bad kyntu ïa ka aiñ ba kin leh da kaba tyngeh ïa kine kiba donkti.
U Sordar ka shnong u Bah R Khyriem u la pynpaw ba ka jingpoi sha kane ka jingjia ka dei na ka jingïabam ïadih bad ba kine ki kñi ki dei kiba ju pynthut ruh ha ka ïing ka sem bad dawa ruh ïa ka bai kyiad na ïing kur ba ki sah.
