Shillong, Rymphang 17
Ha ka miet jong ka sngi Nyngkong, ha ka por kumba 11 baje ei-ei, ki 7 ngut ki briew kiba dei na ka jaidbynriew Muslim, ki la pyni bor bad ktah kti ïa ki samla Khasi ha ki thaiñ Laban, Shillong.
Na ka liang kine ki samla Khasi kiba ym shym la kwah ban pynpaw kyrteng ki la ujor da ka ejahar ha thanad Laban da ka jingsynran lang ki dkhot ka KSU Laban Circle.
La ïoh jingtip ruh ba ïa kine ki Muslim la kem noh da ki pulit ka Laban.
Haba kren sha ki lad pathai khubor u samla Jason Laloo, President ka KSU Laban Circle u la ïathuh ba kine ki muslim ki dei kiba wan bylla bad wan ïaid sha katei ka thaiñ da kawei ka kali bad ki samla kiba la ïakynduh mar pyrshah bad ki kali jong ki, haba ki la ïakren da kaba ong ba ki wan na ka ‘wrong way’ ne ka lynti ba bakla hynrei kine ki Muslim ki la pyni bor bad ktah kti pynban.
U la ïathuh ruh ba kine ki Muslim ki la rah ruh da ki tiar pynmynsaw ba kynthup ki wait, ki tyrnem bad ki samla na Laban ki la mynsaw.
“Ka seng ka pynsngew ruh sha ki trai ïing ba kumno ki ai lad ba haduh hynñiew ngut ki Muslim ban shongwai lane ban sah ha kine ki thaiñ Laban bad lehse kane ka dei shibynta ba ki pynrieh ïa ki. Kine ki Muslim ki dei kiba na Assam bad ngim tip shai ba nangno ki wan bad khlem kano-kano ka jingbit na u Rangbah Shnong ban pynsah ïa kitei ki Muslim,” la ong u Samla Jason Laloo.
