Shillong, Rymphang 17
U President ka seng Liang Pyrshah – Voice of the People Party (VPP) bad nongmihkhmat ka Nongkrem, Bah Ardent Miller Basaïawmoit u la kynnoh ïa ka Sorkar Jylla ba kam shym la ailad bha ïa ka Liang Pyrshah ban rah ïa ki mat kiba ktah ïa ki paidbah nongshong shnong ka Jylla.
“Ngan kren beit da kaba shai, ki paidbah ki la ïohi kumno ka Sorkar ka pynïaid, kumno la pynïaid ïa ka Ïingdorbar, kumta ki paidbah ruh ki sngewthuh ba yn ym ailad bha ïa ka seng ka Liang Pyrshah ban rah ïa ki mat kiba ïadei bad ki paidbah,” ong u Bah Ardent ha ki nongthoh khubor ha ka Sngi Ba-ar, hadien ba u Lamphang u la khanglad ïa ka jingïakren halor ka jingbthei ba dang shen jong kawei ka par dewïong.
U la bynrap ba watla la pyrshang ban bud ryntih ïa ki ‘Rules of Procedure and Conduct of Business’, hynrei bunsien ka Liang Pyrshah ka shah khanglad ban kren hapoh Ïingdorbar.
“Ngin pyrshang. Ngi la pyrshang bad ngi la leh katkum ki kyndon…ngim kwah ban ïaid palat…namarba ki paidbah ki la dep ban rai, ki la ïohi kaei kaba kane ka Sorkar ka la leh,” u la ong.
“Ka don ka por ïa kaei-kaei baroh”, la ong u Bah Ardent haba pynpaw ba ki paidbah ki la dep ban bishar ïa ka jingtreikam jong ka Sorkar.
