Guwahati, Rymphang:
U nongïalam jong ka seng Congress u Debabrata Saikia, ha ka sngi Ba-ar, 17 tarik Rymphang, u la ai dak ba u President barim jong ka Assam Pradesh Congress Committee (APCC), u Bhupen Borah, u lah ban leit pynïasoh sha ka seng Bharatiya Janata Party. Kane ka jingkren jong u ka long shi sngi hadien ba u Borah u la phah ïa ka shithi iehnoh kam na ka seng.
Haba kren bad ki lad pathai khubor, u Saikia u la ong ba u Myntri Rangbah ka jylla u Himanta Biswa Sarma kum u khlieh duh jong ka sorkar ba la jied, u dei hok ban ïoh ïa ka jingpdiang sngewbha kat shaba u leit. “Dei ban pdiang sngewbha ïa u Myntri Rangbah ka jylla kat shaba u leit namar ba u dei u Myntri Rangbah ba la jied jong ka Assam”, la ong u Saikia.
Hynrei une u nongïalam ba pawkhmat jong ka seng Congress um shym la sangeh ha kaba ïadei bad ki jingjia hapoh ka seng. Haba ïadei bad ki jingkren kynthoh jong u Bhupen Borah dang shen ïa ka Congress, u Saikia u la kynthoh da kaba ong, “Mynta, u Bhupen Borah u la sdang ban kren beiñ ïa ka Congress. Nga sngew ba u Bhupen Borah un rung sha ka BJP, hynrei ngam pat lah ban ong ïa kaei kaba don ha ka jingmut jong u.”
Watla ym pat don kano kano ka jingpynthikna kaba shai na u Borah ha kaba ïadei bad ka jingleit sha ka BJP, hynrei ka jingkren jong u Saikia ka lah ban pynjur ïa ka jingïakynad bad pynjur ïa ki kynrum kynram hapoh ka kynhun pyrshah.
La ïathuh ba u Borah u la phah ïa ka shithi iehnohkam sha u President jong ka All India Congress Committee (AICC) u Mallikarjun Kharge.
Ki briew kiba don hapoh ka seng ki la pynpaw ba la ïathuh ba u Borah um sngewtynnad ïa ka hukum jong ka kynhun ka liang pyrshah halor ki jingleh jingkam hapoh ka jylla. Dang shen u la shah bynshet ban ïalam ïa ka jingïalang ba kongsan jong ki seng pyrshah, ba kynthup ïa ka Raijor Dal ba la ïalam da u Akhil Gogoi bad kiwei kiwei ki seng riewlum.
