Shillong, Rymphang 18
U Bah Paul Lyngdoh uba dei u MLA ka UDP na West Shillong Constituency u la kyntu ïa ka Sorkar ba ka dei ban phiah noh la ka jong ka East Khasi Hills district bad ïa ka nongbah Shillong.
U Bah Paul u la wanrah ïa kane ka mat jingïakren lyngba ka ‘short duration discussion’ hapoh dorbar ha ka sngi Balang. U Bah Paul u la ong ba ha East Khasi Hills district ki don haduh 17 tylli ki constituency bad 9 tylli ki dei na Sor Shillong bad ka jingbun briew ka long palat 5 lak 32 ngut.
U la ong, ka jingbun ki kam sniew ha East Khasi Hills namar ka la heh ka jaka bad la bun ki briew katba ki lad ai jingïada ïa ki paidbah ki duna.
U Bah Paul u la wad bniah ïa ka jingïaid lynti jong ka histori jong ka nongbah naduh ba ka la long ka nongbah jong ka Jylla jong u Chief Commissioner ha u snem 1874 haduh ba ka la shakri kum ka nongbah jong ka Assam bym pat phiah bad hadien ka Meghalaya.
U la pynskhem ba ka jingkylla sor kaba stet, ka jingbun briew bad ka jingkiew jong ki kam runar ka dawa ïa ka jingpynbeit thymmai kyrkieh ïa ka synshar khadar.
Haba pyni ïa ki jingkheiñ jingdiah, u la ong ba ka sor Shillong ka don ïa ka jingbun briew kaba palat 5.32 lak ngut bad ka jingbun briew ka long 8,200 ngut ha kawei ka square kilometer – kaba kham heh shibun ban ïa ki katto katne ki district kiba la don lypa, kine ki dei ki jingshisha kiba suk ki ban pynngeit ïa baroh ban kyrshan ban pynlong ïa ka Shillong Agglomerate kum ka Metropolitan District.
Haba kyrshan ïa kane ka jingtyrwa, u MLA ka Nongthymmai u Bah Charles Pyngrope u la batai ïa kane ka sienjam kum “ka jingdonkam,” da kaba kdew sha ka jingkiew ka jingkit ha ki ophisar synshar namar ka jingkiew jong ki projek na ka Sorkar Pdeng. U la kyntu ïa ka Sorkar ba ka dei ban ngam bha bad ban pyrkhat ban ai District la ka jong ïa ka nongbah Shillong.
U MLA ka Mylliem u Bah Ronnie V Lyngdoh u la pynpaw ïa kajuh ka jingsngewkhia, da kaba ong ba ka jingdonkam jong ki pulit ha sor bad nongkyndong ka ïapher shibun namar baroh ki kam runar kiba ktah ïa ka nongbah Shillong, kumta ka la dei ka por ban don ïa ka bor synshar district kaba kyrpang.
Haba jubab ïa ka jingïakren, u Myntri Rangbah u Conrad Sangma u la ong ba ka jingpynbna ïa ka district thymmai ka kynthup ïa ki kyndon kiba bun, kynthup ïa ka jaka, ka jingbun briew, ka jingjngai na ki jaka treikam ba la don lypa, ka jingsuk jong ki paidbah, ka jingïaphylliew jingmut, ka jingdon pisa bad ka jingpyrkhat ïa ka ïoh ka kot.
U la pyntip sha ka ïingdorbar ba kano kano ka jingtyrwa dei ban bishar bniah da ka komiti ba ha khlieh duh ba la khlieh da u Chief Secretary bad kaba kynthup ïa ki heh ophisar na ka tnad Home, Finance, Planning bad kiwei kiwei ki tnad.
