Shillong, Rymphang 18
U Chief Excecutive Member (CEM) ka Khasi Hills Autonomous District Council (KHADC) u Bah Winston Tony Lyngdoh haba jubab ïa ka jingkylli ba la wanrah da ka MDC ka Nongpoh Constituency ka Kong Rona Khymdeit u la ong ba ka Executive Committee (EC) kam don jingthmu ban pynlong ïa ka tamasa Monolith mynta u snem.
Ïa kane u la ïathuh ha ka sngi sdang ka Dorbar mang tyngka jong ka Council bad pynpaw ruh ba ka jingbym lah ban pynlong ïa kane ka tamasa ka dei namar ka jingduna pisa hapoh jong ka Council.
U CEM u la ong ruh ba ha ki snem ki ban sa wan ka EC kan sa pyrkhat bha ha kaba ïadei ban pynlong ïa ka tamasa Monolith, da kaba u la pynpaw ba ka tamasa Monolith ka dei halor ban pynneh pynsah ïa ka riti dustur tynrai jong u khun Khasi bad lada ka biang ka pla tyngka, ka EC kan bteng ban pynlong ïa katei ka tamasa.
Ka Kong Rona ka la bynrap jingkylli biang la ka EC ka la pyrkhat ne em ban pynlong da kiwei pat ki tamasa ha ka jaka jong ka Monolith Festival, kaba dei ka bynta ban pynneh pynsah ïa ka jinglong kyrpang ki riti dustur u Khasi, na ka liang u Bah Winston u la jubab ba kam shym la don kaba kum kata ka jingpyrkhat, hynrei ka tamasa Monolith hi kan dei ka ban pynneh pynsah ïa ka riti dustur, katba ka EC ka dang donkam ban sngewthuh bha shuwa ïa ka jingdon pisa ka Council.
