Shillong, Rymphang 18
Ki pulit ka Anti Narcotics Task Force bad ki Pulit Special Squad (Anti- Infiltration Directorate) lem ki ophisar na Cantonment Beat House bad thanad Sadar ha ka step sngi Balang, kila hiar khynra nongkhaïi drok ha Lum Survey, Shillong bad ki la ïoh kem ïa lai ngut ki suba nongkhaïi drok.
Kane ka jinghiar khynra ka la long ha ka por mynstep, kaba la pynlong hadien ka jingïoh lum ïa ka khubor kaba thikna, halor ka jingdon jong kine ki nongkhaïi drok ha katei ka jaka. Ïa kane ka jingkhynra la ïalam da u Deputy Superintendent of Police Simseng A Sangma.
Ki lai ngut kiba la shah kem ki kynthup ïa u Ashad Ali ba 39 snem ka rta, u Jaharuddin ba la 28 snem bad u Bishu Barman ba 24 snem ka rta.
Na kine ki nongkhaïi drok, la ïoh ban kurup ïa u drok heroin ba la thep ha ki 83 tylli ki vials ne ki tyndong ba rit ha kaba ka jingkhia u drok ka long 9.84 gram.
Ïa kine ki briew la kit noh sha thanad Sadar bad la register case ïa ki hapoh ki kyndon ka NDPS Act. Ka jingtohkit ïa kine ki nongkhaïi drok kala ïaid shakhmat.
Ha kane ka jingkhynra, ki Special Squad ki la bat ruh ïa ki hynriew ngut ki briew naba kim don satia ïa ki kot ki sla ban pynshisha ba ki dei ki nongshong shnong ba pura bad mynta ki dang shah kylli jingkylli.
