Tehran, Rymphang:
Ka Iran ha ka Sngi Ba-ar, ka la pynbna ia ka jingkhang ba shipor ia ka Strait of Hormuz naka bynta ki jingpynkilan ia ki shipai duriaw ha katei ka bynta, katba ka Iran bad ki bor ka US ki dang iakren halor ki kam ‘Nuclear’.
Kane ka long ka sien ba nyngkong eh ia ka Iran ba kan pynbna ban khang ia katei ka lynti ïaid duriaw, ha kaba 20% na ki ri ka pyrthei ki ju pyndonakm ia katei ka bynta ban pynpoi ia ka umphniang sha kylleng ki jaka bad kane ka jingpynbna jong ka Iran ka long ha kum kane ka por ba ka US ka la sdang ban byrngem ia ka Iran haba iadei bad ki jingiateh ha ki kam nuclear.
Kumta, la ong ba, katba ka jingiakren ka dang ïaid sha khmat, ki bor pyniaid ka Iran ki la pynbna ba ka tnat shipai jogn ka Iran kan pynlong ia ka jingpynkilan ba shipor, da kaba ther ‘namding sha katei ka bynta jong ka duriaw bad kumta la khang noh shuwa shipor ia katei ka lynti ïaid duriaw.
U heh nongialam ka Iran, u Ayatollah Ali Khamenei u la maham ruh ba ka tnat shipai kaba khlaiñ duh ha ka pyrthei jong ka US, teng-teng ka lah ban ioh mad ia ka jingshah thombor kaba shyrkhei tam bad kaba kan nym lah shuh wat tang ban tehlakam ne ban ialeh pyrshah ruh.
U myntri kam bar ri jong ka Iran hadien u la shim da ka sur kaba pher, da kaba pynpaw ïa ka jingkyrmen halor ka jingïakren bad ong “ka jingkhang kaba thymmai ka la plie” na ka bynta ban poi sha ka jingïateh kular.
“Ngi don ka jingkyrmen ba ki jingiakren kin ialam sha ka jingpynbeit kaba neh bad kaba lah ban shakri ia ki jingmyntoi jong ki seng kiba iadei bad ka thain kaba heh,” la ong u Abbas Araghchi ha ka jingialang jong ka UN ban pynduh tiar ialeh hadien ba u la ialam ia ka kynhun jong ka Iran ha ka jingiakren kaba la long ha Geneva.
U la bynrap ba ka Iran “ka dang long kaba la pynkhreh pura ban iada ialade na kano kano ka jingma ne jingleh donbor,” bad ba ka jingma na kano kano ka jingshah thombor ia ka Iran kan ym kut tang ha ki pud jong ka.
Um shym la kdew kyrpang shaphang ki jinghikai shipai ne ka jingkhang ia ka duriaw bah Hormuz.
U president jong ka America, U Donald Trump, uba la weng noh ia ka jingiateh nuclear kaba kham mynshwa bad ka Iran ha ka samoi treikam ba nyngkong jongu, ula byrngem bunsien ban pyndonkam da ka bor ban pynbor ia ka Iran, ba kan mynjur ban khanglad ia ka prokram nuclear jongka. Ka Iran, ka la ong ba kan jubab da ka jinghiar thma jong ka hi. U Trump u la byrngem ruh ia ka Iran halor ka jingpyniap ia ki nongiakhih.
