Shillong, Rymphang 18
U Bah Titosstarwell Chyne MDC ka Sohra Constituency u ba long ruh u nongïalam ka Liang Pyrshah ha Khasi Hills Autonomous District Council (KHADC) u la khluit tar bad pynpaw jingbitar namar ka jingbymshai ka jingjubab u Executive Member (EM) Elaka u Bah Denzil R Chen haba ïadei ka jingpynslem jong ka Council ban ai sanad ïa u Maremdor Syiem ba un long kum u Syiem ba pura jong ka Hima Sohra.
Kane ka jingkhluit u Bah Titosstarwell ka dei ha ka ‘motion’ ba la wanrah da u MDC ka Shella Constituency u Bah Barikupar Synrem ha ka sngi sdang jong ka Dorbar Mang Tyngka jong ka KHADC kaba la sdang ha ka 18 tarik Rymphang.
U Bah Titosstarwell u la pan jingshai halor ka shithi ba la ai sha ka EC kumjuh sha u EM ha ka 10 tarik u Naiwieng 2025 kaba la batai ïa ki jingjia naduh ba ïap u syiem haduh ba ka Hima ka la jied ïa u Maremdor ban long kum u Syiem ka Hima Sohra bad ha ka 12 tarik la ai ruh ïa ka rai jong ka kur Syiem jong ka Hima kaba dei ba bat ïa ka kam Syiem.
Shuh-shuh u la ong haba u Syiem ba la shah jied da ka Dorbar, ka Kur, kiba Khraw bad ki Myntri u leit ban ai ka jingthoh sha u EM, ka jubab ba la ïoh ka long ba ka la biang nadong shadong bad tang hapoh shi taïew ka KHADC ka lah ban ai noh ïa ka Sanad, hynrei kane ka kam ka khlem urlong hadien da ki bnai ruh bad kham hadien ka mih da ka hukum ba la thung Acting Syiem ïa u Myntri.
U Bah Titosstarwell u la kynnoh ba ka EC ka la pheil ha ka ban pynbeit ïa ki jingeh kiba la jia hapoh ka Hima Sohra bad pan jingshai ruh ba haduh katno bnai bad katno kan shimpor ban pynlong ïa ka jingjied ïa u Syiem hapoh ka Hima Sohra.
U la bynrap ruh ba um sngew ïahap haba ïadei ka jingpynmih u EM ïa ka kyrteng u P Syiem kum u kyrtong ban ïakhun ïa ka ilekshon Syiem ha kawei na ka jingïathir ïatai haba ïadei bad kane ka bynta. Nalor kata u la kyrpad ïa ka EC ba kan pynkloi ïa ka jingjied Syiem, namar ba ki khun ki hajar ka Hima Sohra ki kwah ban ïoh noh ïa u Syiem ba pura.
