Itanagar, Rymphang:
Haba pynksan ïa ka jingdonkam ban pynbha ïa ka jingkitkhlieh jong ki nongshong shnong bad ka jingpynïaid ïa ka jaka sor kaba kham bha, u K. T. Parnaik ha ka 17 tarik u Rymphang, u la khot ïa ka jingïatreilang ban pynneh ïa ka jingkhuid jingsuba ha ka nongbah jong ka jylla.
Haba pynïaid ïa ka jingïalang bishar bniah ha Lok Bhavan halor ka jingkhuid jingsuba bad ki jingdonkam jong ki paidbah, u Lat u la kyntu ïa ki nongshong shnong ban burom ïa ki jaka paidbah, ban shim ïa ki rukom lehkhuid, bad ban noh synñiang sha ka jinglut jingsep jong ki jingshakri ba kongsan ba la pynbiang da ka Itanagar Municipal Corporation (IMC), katkum ka jingpynbna paidbah.
U la ban jur ïa ka jingpyndonkam hok ïa ka pisa jong ka IMC bad u la khot ïa ka jingshim bynta kaba radbah jong ki nongpynïaid kor ha ka jingthmu bad jingpyntreikam.
U Parnaik u la ong ba ki nongmihkhmat ba la jied ki dei ban shim ïa ka jingkitkhlieh ban pynkhih ïa ka jingïatreilang jong ki paidbah ban pynthikna ïa ka jingbud ryntih ïa ki kamram nongshong shnong bad ki kyndon jong ka jingkhuid jingsuba.
Haba pynpaw ïa ka jingsngewkhia halor ka jingsumar ïa ka jaka thang met jong ka nongbah, u Lat u la ong ba ïa kane ka jaka dei ban pynïaid da ka burom bad ka jingsngewrit. U la ban jur ïa ka jingdonkam ban buh jingthoh bha, ban sumar man ka por bad ban pynïaid da ka jingkitkhlieh ban pynlong ïa ka kaba khuid bad kaba lah ban pyndonkam.
Haba pynpaw ïa ka jingitynnad jong ka Itanagar ïa ka mariang, u Parnaik u la ai jingmut ba ïa ka surok na ka kad liengsuiñ Donyi Polo sha ka nongbah dei ban pynroi sha ka lynti ïaid lynti kaba jyrngam kaba pyni ïa ki jingthung jingtep kiba riewspah jong ka Arunachal Pradesh.
U la ai jingmut ïa ka tnad pynroi sor, ka bor synshar distrik jong ka Itanagar Capital Region bad ïa ka IMC ban ïatreilang ha kane ka bynta.
U Chief Secretary u Manish Kumar Gupta u la khot ïa ka jingïatreilang kaba kham bha hapdeng ki tnad, katba u Urban Development Commissioner u Vivek Pandey u la ai ïa ki jingtip ba bniah halor ka rukom pynïaid ïa ki jaboh jabaiñ, ki jingthmu pynkhuid bad ki lad ki lynti ban pynbha ïa ki jingdonkam jong ki paidbah.
Ka Mayor ka Likha Nari Tadar ka la pynpaw biang ïa ka jingïohi jngai jong ka ban ïoh ïa ka nongbah kaba lait na ki plastik bad pan ka jingïatreilang na baroh ki bynta jong ka imlang sahlang ban pynurlong ïa ka thong.
