Aizawl, Rymphang:
Kumba la buh jingkheiñ, la ong ba u drok uba shongdor T.1,047 klur la ïoh kurup ha Mizoram ha u snem ka mang tyngka 2025-26, namar ba la pynkhlaiñ bha ïa ka jingpahara ha ki khappud hapdeng ki jylla bad shabar ri, la ong u Lat ka jylla u Vijay Kumar Singh ha ka 17 tarik u Rymphang. February.
Haba kren ha ka jingïalang ba nyngkong jong ka dorbar mang tyngka jong ka Ïingdorbar Thawaiñ jong ka jylla, u Lat u la ong ba ka jinglong jingman jong ka aiñ bad ka suk ka saiñ ha Mizoram baroh kawei ka dang ïai long kaba suk ha kane ka snem mang tyngka kaba mynta namar ka jingtrei shitom jong ki pulit bad ka jingbuddien kaba bteng da ki pulit jong ka jylla.
U la ong ba ka jingïatreilang hapdeng ki pulit ka jylla bad ki shipai jong ka sorkar pdeng kum ki Assam Rifles bad ki shipai Border Security Force ka la pynlong ïa ka jingïoh kurup bun bha ïa u drok ha ki pud ki sam jong ka jylla hapdeng ki jylla bad ki ri ka pyrthei.
Nalor u drok, la kurup ruh ïa ki mar kiba heh jong kiwei pat ki mar ba la khang pyrshah, kynthup ïa ki kwai arecanut ba la shalan beaiñ, ka kyiad, ki tiar siat, ki tiar pynbthei bad ka pisa thok, kaba la pynlong ban ïohkem ïa bun ngut.
Ka jylla Mizoram ka ïasam ïa u pud hapdeng ki jylla uba jngai 325 Km bad ka Assam, Manipur bad Tripura, bad u pud u sam ba jngai 828 Km bad ka Bangladesh shaphang Sepngi bad ka Myanmar shaphang Mihngi, kaba pynlong ïa ka ban shah ktah ha ki kam khaïi tuh bad khaïi beaiñ sha shiliang u pud u sam.
